خالد محمود: أنا مؤمن بالسينما النظيفة.. وأرفض مشاهد القبلات خوفا من الذنب
كشف الفنان خالد محمود، حقيقة التصريحات المنسوبة إليه، حول السينما النظيفة وانتقاده الفنانات اللاتي تزوجن من فنانين أو مخرجين ويقدمن مشاهد القبلات.
وقال خالد محمود، خلال حوراه مع الإعلامية ياسمين عز، في برنامجها كلام الناس المذاع عبر شاشة قناة mbc مصر: أنا عمري ما تدخلت في حياة حد وكل واحد مسئول عن اختياراته وبالبلدي كل واحد عقله في رأسه يعرف خلاصه، وأنا مش هعدل على واحد أو واحدة خدت قرار في حياتها وشايفينه صح.
وأكد خالد محمود، أنه رفض تقديم مشهد قبلة في أحد أفلامه خوفًا من تحمل ذنب المشاهد، موضحًا: أنا مؤمن بالسينما النظيفة تمامًا، وأنا تعرضت لها في أحد الأفلام أن المخرج كان عايزني أبوس البطلة، فسألته إيه لازمة البوسة؟ أنت ممكن تعوض المشهد بالكاميرا بطريقة معينة، وهو كان مُصر وأنا رفضت تمامًا والحمد لله صورنا من غير المشهد، وقولتله في النهاية المشهد مش هيضيف وبلاش تخليني ألعب على الغرائز وأشيل ذنب ووزر حد في حاجة حرام.
خالد محمود
كما كشف الفنان خالد محمود، سبب رفضه دخول ابنته المجال الفني، قائلًا: أنا مش بقول إن بنتي متمثلش بغرض إني أزعل الناس مني، ولكن أنا عارف قد إيه الطريق مرهق بالنسبة للبنت، وفي بنات بتقدر تتحمل وفي بنات بيعجزوا في النص وبيقعدوا في البيت، فأنا من إشفاقي على بنتي قولتلها بلاش تمثيل.
وأضاف: بناتي متعددات المواهب والسنة دي بنتي دخلت كلية علاج طبيعي وهتبقى الدكتورة وبنتي الصغيرة بتمثل من أول ما تصحى لغاية ما تنام، وبتقولي عايزة أمثل اشمعنى أنت بتمثل.
