أنا مؤدبة ومحترمة.. لوسي تكذب تامر فرج بعد اتهامات ضربها لزملائها بمسرحية الحفيد
ردت الفنانة لوسي، على اتهامات الفنان تامر فرج لها بالتعدي على بعض زملائها بالضرب والتطاول عليهم خلال مسرحية الحفيد.
وقالت لوسي في تصريحات خاصة لـ القاهرة 24، إن كل تلك الاتهامات غير صحيحة تمامًا، معلقة: الله يسامحه ومن أخلاقه المحترمة طلع قال عني كده، وأسهل حاجة إنك تتبلي على حد وتغلطي فيه وأصعب حاجة إنك تمسكي لسانك، وأنا مش هرد على الإساءة بإساءة لأني متربية ومؤدبة ومحترمة وبحترم نفسي والقارئ والجمهور اللى شرفني في عرض مسرحية الحفيد.
تصريحات لوسي
وتابعت لوسي: لو أنا ست مش كويسة مكنش حد سأل فيا ربنا يرد له الإساءة، ومفيش قاضي أكبر من ربنا وحقي هيرجع وحسبى الله في أي حد بيتبلى عليا وربنا هياخد حق المظلوم.
واستكملت بوسي: الجمهور هيعرف أن الراجل ده غلاط وربنا أمر بالستر، وفكرة إنك تتبلى على حد عايش ده بيبقى في وش اللي بيتبلي.. لكن أنا موجودة والجمهور عارف إني مهذبة وبحترم الجمهور والشغل وخشبة المسرح وكاميرا السينما والتلفزيون
وأكدت لوسي، أن تامر فرج يتنمر على مهنة الرقص إلى جانب شخصيتها قائلة: تامر فرج بيتنمر على مهنة الرقص وعليا، وقادرة أخذ إجراء قانوني ضده لكن محبش أعمل كده.
وواصلت بوسي، قائلة: معرفش هو ماله وليه طلع قال كده، وكان الكلام بينا مقتصر على صباح الخير فقط، أنا في حالي جاية اشتغل مش أتكلم على حد ولا عندي فيسبوك.
كما تطرقت بوسي، للحديث عن حقيقة مشهد ضرب الفنانين، الذي ذكره تامر فرج، خلال تصريحاته، قائلة: أنا أكبر من إني أرد على التفاهات دي، ولكن هناك مشهدين مكتوبين بسيناريو المسرحية فيهم ضرب ومنهم مشهد بنتي بتخطف فـ بضربها بالقلم ده في النص ومشهد ثاني ابني بيقولي أنتِ ست خاينة المفروض بضربه.
