أوس أوس: عادل أمام مرآة للشعب.. والمواطن بيصدق كل ما يقدمه الزعيم
أعرب الفنان محمد أسامة الشهير بـ أوس أوس، عن حبه الشديد للفنان عادل إمام، إذ وصفه بمرآة الشعب نظرًا لما قدمه الزعيم من أعمال فنية خلال مسيرته.
أوس أوس يتحدث عن عادل إمام
قال محمد أسامة أوس أوس في تصريحات لـ برنامج أسرار النجوم، إن الزعيم عادل إمام بمثابة مرآة للشعب، لأنه كان يقدم في أفلامه كل ما يريد أن يقوله المواطن، معلقًا: السر في الزعيم إنه مراية للشعب، أنا كمواطن عادي لما كنت بتفرج على أفلامه كنت بحس إن الزعيم قال كل حاجة كنت بكون عايز أقولها.
وأضأف أوس أوس: كنت أشعر بـ راحة بعد مشاهدة أفلام الزعيم، لأنه قال كل شيء سواء في أفلامه السياسية، الرومانسية، الكوميدية، أي مواطن كان بيصدق اللي بيقدمه عادل إمام، كأنه لمسها وعاشها على أرض الواقع، عشان كدا هو قريب من الناس، وطالع منهم ويعبر عنهم.
وتابع أوس أوس: الزعيم عادل إمام يعتبر مدرسة كبيرة وتاريخ وهرم وكلنا بنتعلم منه، لما بتفرج عليه، كنت بتعلم منه كل أنواع التمثيل، كل تاريخ مصر في كل أفلام عادل إمام، ربنا يديله الصحة.
وتحدث أوس أوس عن دخوله عالم التمثيل، إذ أكد أن الفن وسيلة تجعل أي شخص يفرغ طاقته، ووجدان مشاعر الإنسان تتمثل في الفن والمزيكا والأفلام، موضحًا: ده اللي بيجعل الفنان قريب من الناس.
وعن الغرور، علق أوس أوس: الحمد لله عمري ما كنت مغرور مطلقًا، والجمهور بيتعامل معايا كإني قريبهم، ومسرح مصر كان تجربة جعلت الجمهور يحس إننا قاعدين في الشقة اللي جنبهم، ولو اتغريت على الناس مين هيحبني.
واختتم أوس أوس حديثه عن بدايته، إذ أوضح: كان في شخص في بداية دخولي الوسط الفني هو اللي حببنا في المسرح، وحسسنا إننا بنمثل مصر في كأس العالم، وكنت فرحان بالذهاب لـ مركز الإبداع الفني عند الدكتور خالد جلال، ودي كانت مرحلة تانية في حياتي لأن المسرح ده بيجيله كل الفنانين، معلقًا: بكون سعيد لما أبص على الناس من على المسرح وأشوفهم ميتيين من الضحك.
