ياسمين عز بعد أزمتها الأخيرة: لن أتراجع عن تصريحاتي.. والراجل كيان كبير وبالدنيا
ردت الإعلامية ياسمين عز على منتقدي نصائحها الأخيرة خاصة بعدما أشار البعض إلى أن تصريحاتها كانت من باب الدعابة، مؤكدة أنها لن تتراجع عن آرائها، كما وجهت العديد من النصائح للزوجات.
وقالت ياسمين عز خلال برنامجها كلام الناس المُذاع عبر شاشة إم بي سي مصر: أنا ليا نصيب من اسمي ومعروف عني في الوسط الإعلامي من زمان إني بدلع الضيف وبعمل حوار حلو ما شاء الله عليا، وأنا بدخل البهجة على قلب الناس وبنام مفرفحة من كلامي كل يوم.
وواصلت ياسمين عز: لما بقولك قوليله يا أستاذ محمد بالتنعيم الشتوي أو يا محمد الكبير جدًا دا بيكون بجد ولن أتراجع عن كلامي وسجلوا لي.
كما وجهت ياسمين عز العديد من النصائح للزوجات، قائلة: لو جوزك دكتور أسنان يبقى ربنا بيحبك دا رزق من ربنا، وفيه كل المواصفات اللي بتحلم بها أي ست، متواضع ومؤدب ولسانه بينقط سكر ولا بيطلع منه العيب، كاريزما وبيكون زي الدكتور النفسي من كتر الراحة معاه، وصوته شتوي طول الوقت من كتر البنج، وبيلمع ونضيف.
وأضافت ياسمين عز: بقولك جوزك مش بيرد عليكي لأنه أنه أمين في شغله يرد على التلفون إزاي يا مدام دا بيعالج المريض ودقيق في شغله بطلي تظلميه وتفتكري أنه بيخونك، ومستحيل ست تندم أنها اتجوزت صيدلي، اتحداكم، لأنها متجوزة نسمة وبلسم، والصيدلي له نصيب من اسمه ومهنته، وعامل زي المرهم، ومش هيحتاج يسألك مالك هو بيعرف لوحده، دا ساحر وبيعرف الدوا من لونه.
واختتمت ياسمين عز حديثها، قائلة: اللي طلعت مقولة حس الراجل بالدنيا دي ست متغاظة؛ ودي مقولة محرفة لأن الراجل كيان كبير وحاجاته المحترمة وعيونه وكتافه بالدنيا، وأنا لن أتراجع عن مقولتي كتاف الراجل بالدنيا لأنها بجد ومش هزار.
