نضال الشافعي: مش قادر أسامح الشخص اللي تسبب في مرضي.. ومكنتش هرجع الدنيا
كشف الفنان نضال الشافعي تفاصيل لأول مرة عن مروره بوعكة صحية منذ فترة أدت إلى دخوله المستشفى، مشيرًا إلى أن هناك شخصًا تسبب في مرضه.
وقال نضال الشافعي خلال ندوته بالقاهرة 24: فيه شخص تسبب في مرضي بسبب الضغط العصبي اللي تعرضت له، وجالي القولون وحاولت أسامحه كتير بس مقدرتش لأن فيه صور كانت في ذهني طول الوقت لما كنت بستعيد وعيي في المستشفى، وكنت مش عارف هرجع الدنيا ولا لأ، وكنت بتخيل والدتي بتعيط وأولادي لو حصلي حاجة هيكونوا أيتام ومراتي هتترمل، وكنت بفكر إزاي هيعيشوا؟ ساعتها حسيت إني مش قادر أسامح الشخص دا.
وواصل نضال الشافعي: أنا خلاص مش منتظر أي شيء ولا تكفير ذنب ولا اعتذار منه، وأنا مريت بأيام صعبة خلال مرضي ولكن اتعلمت منها أن حب الناس لا يقدر بثمن وكان توفيق من ربنا إن الإنسان يلاقي ناس بتدعي له خلال مرضه، سواء بيحبوني أو لا، ودعاء الناس دا كان سبب من أسباب شفائي.
واستكمل نضال الشافعي حديثه: اتسربت ليا صورة من المستشفى واتضايقت جدًا ولكن ساعتها لقيت مظاهرة حب من الناس وحسيت إني في زهرة البستان من كتر الورود اللي اتبعتت لي، والزيارات، واتفاجئت بـ حب الناس.
ويذكر أن الفنان نضال الشافعي تعرض نضال الشافعي لأزمة صحية منذ فترة بسبب انفجار إحدى الزوائد القولونية وأدت إلى تدهور حالته الصحية ودخوله المستشفى وخضوعه لجراحة عاجلة.
