علي الحجار عن شقيقه: اتظلم في الدنيا.. والتيارات الإسلامية شوشت أفكاره وأقنعته بحرمانية الغناء
كشف الفنان علي الحجار، العديد من الأسرار عن شقيقه الراحل أحمد، مشيرًا إلى أن الحياة ظلمته ومرت عليه فترة واقتنع بأفكار التيارات الإسلامية.
وقال علي الحجار خلال لقائه ببرنامج كلمة أخيرة مع الإعلامية لميس الحديدي: الدنيا ظلمت أحمد الحجار رغم موهبته الكبيرة، ولكن موهبة أنه يقدم نفسه للناس إزاي مكنتش عنده ومكنش مهتم بالدعاية، كان بيعمل الفن عشان بيحبه فقط برضا ومقتنع زي أبويا أن الشوية اللي بيسمعوه هما دول المثقفين.
وواصل علي الحجار: شقيقي أحمد كان مؤدب وطيب وأنا كنت شقي، وهو اتجوز في الثلاثينات من عمره 3 مرات ولكن فيه زيجة واحدة كانت حقيقية واستمرت سنين، وهو كان مؤدب لدرجة بيتكلم مع زميلاته وهو باصص في الأرض وأول واحدة يلسمها كانت مراته.
وأضاف علي الحجار: أحمد تأثر في فترة دراسته بالجامعة ببعض التيارات الإسلامية اللي أقنعته وشوشت أفكاره بأن الغناء والموسيقى حرام، ولكن والدي قال له هو أنت شوفتني بفوت فرض أو بغضب ربنا؟ أحنا بنسعد الناس، وبالفعل اقنعه يبتعد عن الأفكار دي.
رحيل أحمد الحجار
أما عن تأثره بـ رحيل شقيقه أحمد، علق علي الحجار، قائلا: أحمد توفى وهو بيشوف مباراة بلياردو وأنا فقدت حاجات كتير بعد رحيل أحمد، منهم الحنية والحكمة والطيبة والرضا اللي طول الوقت كان بيصدرهم ليا في عز أزماتي النفسية اللي عمري ما تكلمت عنها وهو كان الشخص الوحيد اللي بتكلم معاه.
