أول تعليق من الهاني سليمان بعد اتهامه بالتفويت أمام الأهلي
علق الهاني سليمان، حارس مرمى سموحة، على تلميحات طارق العشري، المدير الفني السابق للفريق السكندري، بالتفويت أمام الأهلي، في المباراة التي انتهت لصالح الفريق الأحمر بثلاثية نظيفة في الدوري المصري.
أول تعليق من الهاني سليمان بعد اتهامه بالتفويت أمام الأهلي
وقال الهاني سليمان خلال منشور له عبر صفحته الشخصية على فيس بوك: أولا أنا أحب أشكر كل الناس المحترمة اللي قدمت الدعم لي الفترة اللي فاتت.
وواصل: الحمد لله والفضل لله أنا من بعد ماتش الأهلي متكلمتش.. ولا طلعت في أي قناة اتكلم فيها لأن ربنا وهب لي الناس المحترمة أنها ترد غيبتى.
وأكمل: الحمد لله أنا أبويا رباني على كل حاجة حلال في الدنيا.. وعرفني الحلال من الحرام.. أنا طول تاريخي ولعبي كورة.. كل المدربين اللي اتمرنت معاهم تجمعني بيهم أجمل وأحلى علاقه واحترام.. الحمد لله أنا بلعب في نادي محترم ونادي كبير ومجلس إدارة محترم.
واختتم حارس مرمى سموحة الهاني سليمان: في الآخر ممكن أي حد ينتقدني في الكورة.. وده أنا متقبله طبعا.. إنما تشكك في ضميري وفى أخلاقي وفي تربيتي وتطعن في ذمتي.. ده اللي أنا عمري ما هسكت عليه.. إحنا دولة كبيرة وبلد مؤسسات.. والقانون هو اللي بيحكم.. لذلك قررت إني أقدم بلاغ للنيابة في كل واحد تطاول على ذمتي علنا قدام الناس كلها.. سواء مدرب أو صحفي أو عضو.. واللي هيقرره القانون أنا معاه.. وشكرا.
