عمرو أديب عن تصريحات كلاتنبرج: الفضيحة دي مين هيدفع تمنها؟
قال الإعلامي عمرو أديب، إن رئيس لجنة التحكيم في مصر مارك كلاتنبرج، عاد إلى إنجلترا بعد تقديم استقالته إلى اتحاد الكرة المصري، وعقب وصوله صرح لكبريات وسائل الإعلام العالمية بأن رحيله عن مصر جاء خوفًا على حياته عقب تلقيه تهديدات.
وأضاف أديب، خلال برنامجه الحكاية، المُذاع عبر فضائية mbc مصر، مساء الجمعة قائلا: كلاتنبرج راجل جاي يشتغل حكم كورة ويرجع بلده مش جاي يحارب إرهاب، ده بيقول إن حياته كانت في خطر وله متأخرات شهرين من مستحقاته.
وأوضح أديب: كلاتنبرج بعد 5 شهور متواجد في مصر وبيقول جاتلي تهديدات وكمان ليا فلوس، ده كان بيشتغل رئيس لجنة تحكيم أونلاين، ده كان بيعمل زووم على كل حالة تحكيمية ويبعت بها تقرير، متسائلًا: ليه الأجانب دايمًا في مصر بيمشوا بخناقة.. مش فيه عقد.. القانون يتنفذ والراجل ياخد مستحقات عقده.
الفضيحة دي مين هيدفع تمنها؟
وأكمل الإعلامي عمرو أديب: الوضع عبثي وشكلنا بره مش حلو.. الفضيحة دي مين هيدفع تمنها؟، هل دي منظومة الرياضة في مصر؟.. فين دور الدولة الممثل في وزارة الشباب والرياضة، إيه التخبط ده؟.. ده واحد مش متفرغ ورغم ذلك هيرفع علينا قضية بالـ80 ألف دولار بتاعته.
وتساءل أديب: إزاي بنتعامل مع الأشياء وما هي نتائجها؟.. ونرجع نقول إزاي موصلناش كاس العالم.. مرحناش المونديال عشان الملوخية والفخفاخينا، مطالبًا وزير الشباب والرياضة بتطبيق القانون على الجميع وإلا بطلوا الدوري.
