أغنية مجنونة لحنتها وكتبتها وأنا عندي 14 سنة.. أبرز تصريحات العسيلي مع أنغام
حلّ الفنان محمود العسيلي ضيفًا على الفنانة أنغام، ببرنامجها الذي يحمل اسمها، المذاع عبر قناة dmc، وتحدث خلال الحلقة عن كواليس أشهر أعماله مثل أغنية مجنونة وحلم بعيد، كما تطرق للحديث عن شقيقته يمنى العسيلي، التي كتبت له عدد من أغنياته.
أبرز تصريحات محمود عسيلي مع الفنانة أنغام
ونستعرض لكم في هذا التقرير أبرز تصريحات محمود عسيلي مع الفنانة أنغام:
-يمنى أختي بتكتب كلام حلو ولما جالي إعلان قولت ليمنى اكتبي أغنية عن الضحكة، وكتبتها في ربع ساعة بالظبط.
-أغنية حلم بعيد جت بالصدفة، وأنا قاعد على البيانو لقيت اللحن، وأول جملة بس جت في دماغي وخدت 18 شكل لحد ما وصلت بالشكل النهائي ده.
-أنا ويمنى العسيلي شبه بعض في طريقة التفكير والتذوق الفني بس شخصياتنا مختلفة تمامًا، وهي بقت من أشطر كتاب الإعلانات في مصر
-أول مرة أشوف أنغام في الاستوديو سلمت عليا بحماس فظيع، وقالتلي ولادي بيحبوك.
-أول ما الفنان ينجح لازم يبدأ يفكر في اللي الناس بتحبه، ويبقى عنده مسئولية تجاههم من غير ما يتنازل عن هويته واللي هو بيحبه.
-لما أغنية تبات ونبات نجحت وبقت تشتغل في كل الأفراح عملت أغنية الفستان الأبيض السنة اللي بعديها، عشان فهمت الليلة واللي الناس عايزينه.
-يمنى العسيلي كتبت أغنيتي مش زي الأفلام، والأغنية كانت مختلفة وفريدة ومش هعرف أعمل زيها تاني أبدًا.
-أغنية تبات ونبات كان ليها الفضل إنها تعرف الجمهور إن ليا أعمال غير أغنية مجنونة عشان كان كل اللي يشوفني يقول بتاع مجنونة أهو.
-في بداية مشواري كنت عايز أقدم بس اللي أنا عايزه كانت روح الهاوي مسيطرة عليا سيطرة تامة، وأول ألبوم كان في مزيكا أكتر من الغنا، عشان أنا بحب المزيكا أكتر.
-لحنت وكتبت كلمات أغنية مجنونة وأنا عندي 14 سنة، وكانت وش السعد عليا، لكن مش بتمثل ذوقي دلوقتي خالص.
-كنت رافض تمامًا إني أغني أغنية مجنونة ومكنتش عايزها تنزل لأنها لا تُمثلني كمحمود بتاع دلوقتي، عشان عملتها وأنا صغير بس كسرت الدنيا لما نزلت.
