أبرز تصريحات نجلاء بدر التلفزيونية| أرفض مصطلح السينما النظيفة.. وفستاني اللي طلع تريند بقى بيتباع في وسط البلد
تحدثت الفنانة نجلاء بدر عن كواليس حكاية روليت من مسلسل في كل أسبوع حكاية، كما كشفت أحدث أعمالها في رمصان 2023، بالإضافة إلى تطرقها للحديث عن عدة موضوعات أخرى، خلال استضافتها في أحد البرامج الفنية.
وجاءت أبرز تصريحات نجلاء بدر التلفزيونية على النحو التالي:
- جمعني أنا ونضال الشافعي حب العمل وهو شبهي في الفكر الفني والطموح وفي التعامل مع الفن وده كان عاملا من عوامل نجاح حكاية روليت.
- طول الليل والنهار بفكر أعمل مشروع له علاقة بالديكور بس المشكلة إننا كفنانين مش إداريين ومش بتوع أرقام.
- لوكيشن مسلسل سر السلطان هو أحلى لوكيشن دخلته ولوكيشن مخضرم ومدرسة جديدة، وبالرغم من تعاملي مع مخرجين كبار بس مخرج السينما زي خالد يوسف بيبقى عنده رؤية مختلفة تمامًا عن مخرج الدراما.
- شخصيتي في مسلسل رمضان كريم 2 هتفضل زي ماهي بدراما جديدة وامتداد أكبر.
- الملحد هو عنوان الفيلم فقط ومحدش قراه عشان يحكم عليه، والسينما عمرها ما كانت مباشرة أوي كده عشان الفيلم يكون بيتكلم عن اللي عنوانه بيحتويه.
- دوري صغير في فيلم الملحد، ووافقت عشان عايزة أبقى جزء من التاريخ والأسطورة دين والفيلم هينجح وهينُاقش لحد بعد 70 سنة وهيفضل من الأفلام المهمة.
- بطلع من غير مكياج عادي في المشاهد اللي بتحتاج ده، وفي فنانات متقدرش تستغنى عنه عشان الجمهور اتعود عليها به، وهيتخض لو شافها من غير مكياج.
- مازلت راضية ومقتنعة بفستاني اللي طلع تريند وخد انتقادات كتير وبعدها نزل في الأسواق وبقى بيتباع في وسط البلد والناس بتطلبه من برة مصر وبقى اسمه فستان نجلاء بدر ودي حاجة تبسطني.
- أنا شايفة إني محظوظة وواخدة حقي في الفن جدًا واشتغلت مع مخرجين مهمين حتى لو أدوار صغيرة وبعمل أدوار بطولة في مسلسلات قصص قصيرة وفي أفلام.
- برفض مصطلح السينما النظيفة، لأن الفن مفيهوش تظنيف وهو مجرد تسميات.
- معنديش محظورات في اختياري للأدوار وبختارها على حسب أنا عندي طاقة أعمل الشخصية دي صح ولا لأ، ولو لقيت إني مش هعرف ببعد عن الدور عشان احترم الشخصية.
- أغنية في حتة تانية لـ عبد الباسط حمودة واخدة روحي وبحبها جدًا هي وأغنية سايرينا يا دنيا.
- أنا بختار الأفلام اللي ليها معنى وليها مستقبل وهتكون في التاريخ عشان بحب الفن اللي بيكون بذرة بزرعها بتطلع شجرة بعد عشر سنين وفيلم ليلة العيد اللي بشارك فيه من هذه النوعية.
- دلعي المفضل هو اسم نوجي عشان على اسم قطتي اللي عاشت معايا 17 سنة وماتت بعد مرضها.
- معنديش روتين لبشرتي ومش بشرب ماية خالص بس سر جمال بشرتي ورشاقتي في تعاملي بحذر مع الأكل والأدوية المضرة.
