والدة الصيادين الـ 3 المتوفين في حادث تصادم بالدقهلية: فقدت عيالي كلهم في يوم واحد ومش بطلب غير الصبر
شهدت محافظة الدقهلية واقعة مأساوية، حيث لقي 3 أشقاء ونجل عمهم مصرعهم، وذلك في حادث تصادم بين تروسيكل وسيارة نقل على طريق المطرية - دمياط.
والدة الصيادين الـ 3: فقدت عيالي كلهم في يوم واحد ومش بطلب غير الصبر
والتقي القاهرة 24، بوالدة الأشقاء الثلاثة ضحايا الحادث وقالت: أولادي كل يوم بينزلوا يصطادوا من بحيرة المنزلة ويوم الحادث أنا كنت في الجمالية وحد اتصل بوالدهم وقاله ولادك عملوا حادثة، روحنا لمكان الحادث مش متوقعين أنهم ماتوا وتفاجئنا بخبر وفاة ابني الصغير والوسطاني وابن عمهم، وكان محمد ابني الكبير في حالة خطرة وتم نقله لمستشفى المطرية، واحنا بندفن أخواته جالنا خبر وفاته هو كمانن ولادي كلهم راحوا في يوم واحد.
وأضافت باكية: أكبر ولادي عمره 30 سنة، ومتجوز ومخلف 4 أولاد وكان حنين عليا وبيصرف على أبوه المسن وابني الوسطاني عمره 26 سنة وعنده 3 أطفال منهم رضيعة عمرها 20 يوما، وابني الصغير عمره 24 سنة وعنده طفلين وابن عمهم عريس وعنده طفل عمره شهور، وكان عندي ولد وتوفى كمان من سنتين ومش بطلب غير الصبر من عند ربنا.
واستكملت: ولادي كانوا محبوبين من الجميع وجنازتهم كانت مهيبة وفيها البلد كلها وكانوا عايشين في حالهم ودخلهم كان 30 لـ 60 جنيه في اليوم وكانوا بيحمدوا ربنا.
واختتمت قائلة: أنا مش عايزة حاجة غير حق ولادي لو في معاش علشان خاطر ولادهم الأطفال دول.
