ماجدة خير الله تنتقد مقارنة مسلسل أزمة منتصف العمر بـ العشق الممنوع: العمل بيقدم نماذج مسكوت عنها في المجتمع
علقت الناقدة الفنية ماجدة خير الله، على ردود الأفعال والانتقادات الموجهة لـ مسلسل أزمة منتصف العمر، بطولة الفنان كريم فهمي وريهام عبد الغفور، بسبب وجود مشاعر من بطل العمل تجاه حماته خلال أحداث العمل، وتشبيهه بالمسلسل التركي العشق الممنوع.
وقالت ماجدة خير الله، في تصريح خاص لـ القاهرة 24: ليه الجمهور بيشبه مسلسل أزمة منتصف العمر بـ مسلسل العشق الممنوع إيه العلاقة بينهم؟ إحنا المفروض مناخدش كلامنا من السوشيال ميديا لأن مش هما اللي هيقودوا تفكيرنا؟ إحنا منعرفش مين دول، المفروض اللي يتكلم يكون عنده دراية ويوضح، ولكن منستسلمش لكلام مجموعة من الناس منعرفش هما إيه خلفيتهم عن الموضوع وكل واحد يقول اللي يطلع في دماغه.
أما عن انتقاد الجمهور لمشاعر البطل خلال أحداث مسلسل أزمة منتصف العمر تجاه حماته، قائلة: ليه منسلطش الضوء على مشاعر شخصية كريم فهمي في المسلسل تجاه حماته؟، الناس مش فاهمة يعني إيه دراما، الدراما مش إننا نقدم ناس حلوين ومؤدبين، الدراما هي النفس البشرية بكل ما فيها من أخطاء وخطايا ونماذج موجودة في المجتمع ومسكوت عنها.
وتابعت: المسلسل مقدم حالة البطل بشكل كويس جدًا، طب مش المفروض نشوف حالة البطل إيه وتركيبته عاملة إزاي؟ ليه بنحكم من 4 حلقات بس؟ هو لسه قدم حاجة؟، البطل عنده عقدة من أمه وده شيء متقدم بشكل كويس جدًا لأن هذه الأم مكنتش مثالية وكانت كثيرة الزواج من شباب صغير وسابت ابنها، والولد طبيعي علاقاته الإنسانية مرتبكة، بالإضافة إنه عجبه نموذج ريهام عبد الغفور اللي هو مضاد تمامًا لصورة أمه، لأن شخصيتها ست متحفظة هادئة وكتومة بتتحمل كل مشاكل زوجها ونزواته وبتحاول تحافظ على حياتها حتى إنها بتيجي على نفسها، فهذا النموذج عجبه لأنه رافض نموذج أمه لأنها مكنتش أمينة معاه وسابته وهو صغير واتجوزت عيال صغيرة وده أثر عليه في علاقاته مع النساء وده وبقى مش عارف يكون علاقات إنسانية.
واختتمت ماجدة خير الله حديثها: المشاعر الإنسانية محدش يقدر يعمل فيها حاجة، والبطل لقى نفسه مشدود لهذه المرأة زوجته لأنها نموذج مختلف خالص عن أمه، بيتكلموا على السوشيال ميديا على إيه بقى؟ هو لسة عمل حاجة ولا بان حاجة؟.
مسلسل أزمة منتصف العمر
مسلسل أزمة منتصف العمر، بطولة الفنان كريم فهمي، ريهام عبد الغفور، ركين سعد، رنا رئيس، عمر السعيد، رشدي الشامي، هاجر عفيفي، والمسلسل من تأليف أحمد عادل سلطان ومن إخراج كريم العدل، وتدور أحداث العمل في إطار اجتماعي تشويقي.
