سحر رامي: الوهابية حرمت علينا الحب.. والستات كانوا بيلبسوا مايوهات براحتهم قبل ظهور الحجاب
تحدثت الفنانة سحر رامي عن تأثير الوهابية في المجتمع، مؤكدة أن الزمن اختلف وتم تحريم الحب، كما كشفت عن رأيها في الأعمال الفنية التي تُقدم حاليًا.
وقالت سحر رامي لـ القاهرة 24: زمان الستات كانوا بيلبسوا مايوهات براحتهم قبل الوهابية وظهور الحجاب، ومع الأسف مجتمعنا انهار، وحرموا علينا الحب وبقى مينفعش اتنين يحبوا بعض ولا في السينما ولا في الواقع، وبالتالي منقدرش نقدم أعمالا رومانسية لأنها مش موجودة من الأساس في الحياة وأصبح هناك تطرف فكري والدنيا زمان مكنتش صعبة كدا.
كما تطرقت سحر رامي للحديث عن الأعمال الفنية التي تُقدم حاليًا، قائلة: الدنيا اتغيرت وزمان الفنانين كانوا بيتعبوا أكتر لأن مفيش تكنولوجيا زي دلوقتي وبيصوروا المشاهد كأنهم في مسرح وفي حالة حدوث أي خطأ بيعيدوا كل حاجة من الأول، لكن دلوقتي فيه قطع ومونتاج وتطور كبير، ومع ذلك مفتقدين للفكر لأننا مبنقدمش أعمال مستوحاة من الروايات وكمان بنبدأ تصوير والسيناريو مش كامل ودا بيخلينا كـ فنانين مش قادرين نعيش في الشخصية لأننا منعرفش باقي الأحداث.
وواصلت سحر رامي: لازم نقدم أعمالا لها قيمة لأن مش كل حاجة محمد رمضان بقى، ونقدم أعمال من روايات زي ما كان وحيد حامد بيعمل، ولذلك قدم فنا عظيما، إنما دلوقتي تدهورنا، والفنانات بيرفضوا أعمال ويقولوا لا محدش يلمسنا، مش فاهمين إن الفن مفهوش شروط والتزام.
