رضا إدريس: فكرت في اعتزال التمثيل.. وزعلان على الأوقات اللي ما ذكرتش فيها ربنا |خاص

تحدث الفنان رضا إدريس، عن ذكريات أجواء التصوير في بداية مشواره الفني بالتعاون مع كبار النجوم مثل عادل إمام ونور الشريف وأحمد زكي، مشيرًا إلى أن كواليس التصوير اختلفت تمامًا عن السابق، إلى جانب حديثه عن تفكيره في اعتزال التمثيل.

وقال رضا إدريس لـ القاهرة 24: كواليس زمن الفن الجميل ما تتكررش، لكن دلوقتي الحكاية باظت، النهارده بدخل البلاتوه زي الغريب والشباب فيهم المحترم وفيهم اللي مش بيتعاون وحاسس نفسه نجم، وبتحصل حاجات غريبة، زمان كان فيه ألفة وأريحية ومحبة وجدعنة مع الجميع دون استثناء، دلوقتي كل الناس غريبة في الوسط حتى الفنيين والمخرجين، والمكان الناس اللي فيه مش حابين بعض ومش قريبين من بعض.

وأضاف: اللي بيحصل مش فن، لكن بناكل عيش وعاوزين نعيش واللي زينا بناخد فتات، النجوم الحلوين اللي دلوقتي اللي منهم بيعمل عمل ويطلع مشهدين تاني عمل يعموله بطل بكل سهولة بعلاقات وهزار وحب ورشاوي بيعرفوا بيظبوا نفسهم، واللي عملوا عيل ما عملوش عبد الحليم حافظ واللي كسبوا عبد الحليم ما يجيش يوم في حياة هؤلاء.

فكرت أعتزل وأشتغل أي حاجة 

وأشار رضا إدريس إلى أنه فكر في اعتزال التمثيل أكثر من مرة، قائلًا: فكرت كذا مرة اشتغل أي حاجة أو أرجع لتصليح الأجهزة الإلكترونية لأن كان عندي مركز خدمة للأجهزة، لكن مفيش شغل كويس ومتطلبات الحياة زي المدارس والجامعات وقدر الله وما شاء فعل لحد ما نلاقي حاجة تنفع.

وأكد رضا إدريس أن أبناءه لا يحبون التمثيل، قائلًا: ولادي الحمد لله من نفسهم مش حابين يشتغلوا في التمثيل، وهما مش شبه الناس ولا الحياة دي.

عادل إمام كان بيسأل عليا 

وعن كواليس تعاونه مع النجوم الكبار مثل عادل إمام، قال: كنا أصدقاء وحبايب وفي كل وقت كان بيكون فيه ضحك وانبساط وهزار، وعادل إمام كان بيسأل عليا ويقول ليه مش معانا في الفيلم أو المسلسل اللي بيشتغل فيه، يعني كلها حاجات إنسانية، مردفًا: لكن دلوقتي في ناس بطلت الشغلانة وفي ناس قاعدة في بيوتها، وفي ناس بتشحت وناس اتجهوا للتيك توك، والدنيا اتكسرت خلاص مش موضوع فن ولا مواهب ولا دراسات أي حد عاوز حاجة يعملها ومفيش حد عنده ضمير يخدم حد في الأعمال اللي بيقدمها.

زعلان على الأوقات اللي ما ذكرتش فيها ربنا 

وعن أكثر شيء ندم عليه قال: بزعل على الأوقات اللي ما ذكرتش فيها ربنا والوقت اللي ضاع في الهوا والصلوات اللي بتضيع مننا وأوقات الفراغ في الشباب، وبنصح الشباب ما يضيعوش وقت لأن مش كل حاجة فلوس ويسيبوا نفسهم لأعمال ضالة وكل واحد يجتهد في مجاله لأن العملية باظت، وأنا بقول اللهم توب عليا، ويا رب يتقبل لكن الحياة غريبة بتاخدك وتلاقي نفسك رايح لحاجات دنيوية وربنا يتقبل.

إلى جانب ذلك، تحدث رضا إدريس عن أعماله الفنية المقبلة، مشيرًا إلى أنه يشارك في مسرحية بعنوان همام وعصابة الضباع مع إيهاب مبروك وإبراهيم الملاح، إلى جانب مجموعة من الأطفال والشباب ومن المقرر عرضها في إسكندرية.

كما يشارك رضا إدريس الفنانة نيلي كريم ويسرا في مسلسل بالطو روز وليلى، المقرر عرضه على أحد المنصات في أول تعاون له معهما، إلى جانب مشاركته في سيب وأنا أسيب والذي يضم مجموعة كبيرة من الفنانين منهم هنا الزاهد ومحمد جمعة ومحمود البزاوي وعارفة عبد الرسول وغيرهم.

وعن تعاونه مع يسرا في روز وليلى قال: يسرا فيها لطافة وحبوبة ولذيذة وبتساعد زملاءها وبتقترح طول الوقت يعني مش حكاية نجمة كبيرة.

ميرهان حسين: فكرت أعتزل الفن لأني مش متقدرة.. والوسط بيمنح فرص لأشخاص معدومين الموهبة