تصريحات سالي عبد السلام عن إصابتها بالثعلبة: اتعلمت أعمل شعري بـ إيدي عشان مكسوفة من الكوافير
حلّت الإعلامية سالي عبد السلام ضيفة على زميلتها لميس الحديدي، بـ برنامجها كلمة أخيرة؛ لتروي تفاصيل معاناتها مع مرض الثعلبة، التي تحدثت عنه أكثر من مرة عبر صفحاتها على مختلف مواقع التواصل الاجتماعي.
وجاءت تصريحات سالي عبد السلام على النحو التالي:
-مش سهلة إني أعمل فيديو زي اللي عملته، لكن حبيت أوعي الناس بالمرض، وإن إزاي التوتر والتعب والضغط النفسي بسيبوا ده.
-اكتشفت أول مرة إصابتي بالثعلبة من خمس سنوات بعد فرح أخويا، وكنت بستعد له في الكوافير اللي قالي روحي للدكتور، ولما لقيت عندي أربع بقع فارغة في شعري اتقهرت.
-شكة الحقنة صعبة، وباخد 8 حقن كل واحدة 10 شكات، يعني 80 شكة.
-اتعلمت في بداية إصابتي أعمل شعري بإيدي من غير كوافير، عشان مكسوفة، وأصبت به لسبع مرات.
-أنا عاوزة الناس ترحم بعض، وبلاش تنمر على السوشيال ميديا وأنا بخاف من التنمر جدًا.
-جيل الثمانينات شاف كتير أوي وطلع عينه وأنا بخاف من الحسد، والضغط العصبي بيخليني أكسر سناني وأنا نايمة.
-قصص الجمهور أثرت فيا جدًا وبتوترني، وبقرأ القصة الواحدة عشر مرات.
-كنت عاوزة أوري للناس التعب اللي بنتعبه في مجال الإعلام وإننا مش مرتاحين زي ما قلة منهم فاكره كده.
-إحنا بنتعرض لضغط نفسي وعصبي كبير بسبب الشغل في الإعلام.
-بعد ما شفيت في المرة الأولى، زرت مستشفى 57357 واتعلمت كتير من زيارتي ليها.
سالي عبد السلام تعلن إصابتها بالثعلبة مجددًا
على جانب آخر، أعلنت سالي عبد السلام، مؤخرًا، عودة مرض الثعلبة لها، من خلال فيديو صورته في أثناء تلقيها العلاج، ونشرته عبر صفحتها على فيس بوك، وعلقت قائلة: دخلت الدوامة دي تاني.. مرض الثعلبة وخلل المناعة للمرة السابعة في 5 سنين، سبحانك يا رب.
وأضافت: يا دوبك لسه مخلصة علاج وكورتيزون، وحاولت اخس تاني وأرجع أعالج شعري من الصيف، في 5 شهور تعافي بعد ما تتعالج تطلع تاني بالسرعة دي.. ودي أول مرة تحصل.
وتابعت: 3 شهور من الضغط النفسي والعصبي، ودي أول حاجة بترجع المرض ده، وحاولت أمثل إني كويسة زي ما على طول بعمل، بس جسمي كل مرة بيرفض يمثل معايا، وابتلي في أكتر حاجة كنت بحبها.
واختتمت حديثها، طالبة من متابعيها بالدعوة لها قائلة: ادعولي، ومفيش حاجة تستاهل إنك تضغط على نفسك ولا تزعل وتمرض وتموت.
