هالة صدقي: المسرح حاليًا بيقدم اسكتشات.. واعتذرت عن المشاركة مع محمد صبحي لهذا السبب
تحدثت الفنانة هالة صدقي عن أهمية المسرح ورأيها في العروض المسرحية التي يتم تقديمها خلال الفترة الحالية، كما كشفت أنه كان من المقرر أن تشارك في مسرحية جديدة مع الفنان محمد صبحي، لكنها اعتذرت عنها لعدة أسباب.
وقالت هالة صدقي في خلال ندوتها على هامش فعاليات مهرجان الأقصر للسينما الإفريقية: أنا عاشقة للمسرح، وكان في عروض مسرحية كتير الفترة اللي فاتت، لكن ده مش مسرح، أنا شايفة إنهم بيروحوا يعملوا اسكتشات، وفي جمهور للفن والفنانين المصريين، فـ إحنا لازم يبقى عندنا شوية سيطرة وتنظيم للفرق المسرحية اللي بتسافر تعرض في البلاد العربية، لأن في الاخر دي شايلة اسم مصر.
وأضافت هالة صدقي: مهم أوي نركز على إحنا بنقدم إيه في المسرح، وحلو إننا نستغل فرصة إن في جمهور عايز مسرح وحابب يتفرج علينا، بس الأهم إحنا هنقدم له إيه، ولما نعمل عرض يتعرض يومين ويجيب قرشين بس ده بيقفلك السكة اللي بعد كدة.
وواصلت صدقي حديثها عن المسرح قائلة: لازم تثبت وجودك وتثبت فنك، وميكونش التفكير المادي هو نمرة واحد عندك، وأنت بتعمل مسرح، وللأسف في حالة من الاستسهال والتساهل الشديد جدًا موجودة دلوقتي، والمسرحية بقت بتتعمل في 3 و4 أيام، معرفش إزاي ده بيحصل، دي حاجة بتسئ لينا.
هالة صدقي تكشف سبب اعتذارها عن مسرحية محمد صبحي
وكشفت هالة صدقي سبب اعتذارها عن المشاركة في مسرحية للفنان محمد صبحي، قائلة: لما أعمل مسرحية لازم أعرضها شهر عشان المُشاهد ميحسش إني مش بحترم وقته وبقدم له سلعة مضروبة، ونفسي أرجع مسرح بس يكون مسرح صح، وبالنسبة لمسرحية أستاذ محمد صبحي كان سبب اعتذاري عنها أولًا إن كان عندي ارتباط، ثانيًا المسرحية كانت كلها كوميدي ودوري أنا بس اللي كان تراجيدي.
وتابعت صدقي: قولت لـ محمد صبحي أنا كدة هبقى نقطة ضعف في المسرحية، طبعًا أنا هموت واشتغل معاه بس اضطريت أرفض، عشان الناس لما تلاقيني أنا وهو مع بعض على الأفيش هيكونوا مستنين يدخلوا يضحكوا، وهيلاقوني تراجيدي وده هيأذي المسرحية مش هيفيدها.
