زوج علا غانم: ضربتني بالزجاج في جبهتي.. ووالدتها عملتلي جرح قطعي في دراعي
اتهم رجل الأعمال عبد العزيز حسن، زوجته الفنانة علا غانم بالاعتداء عليه وإصابته بجرح قطعي في الذراع، بعد عودته من أمريكا وذهابه لمنزل الزوجية، مؤكدًا أنه لم يتعرض لها مُطلقًا.
وقال زوج علا غانم، في لايف مع القاهرة 24، إنه ذهب لـ فيلا الزوجية الخاصة به والفنانة علا غانم، وحاول فتح الباب ولكنه لم يستطع بسبب تغيير كالون الباب، كما كشف عن مواصفات الرجل الذي اعتدى عليه بالضرب، موضحًا: رجعت بيتي في القاهرة يوم جمعة لقيتهم مغيرين الكالون بتاع الباب، رنيت الجرس وفتح الباب ولد رفيع وأسمر ومقطع وشه وشكله مش مظبوط وبلطجي والله أعلم هو إيه، قالي إنت مين هو ميعرفنيش وتقريبًا هي لسة معيناهم، قولتله أنا صاحب البيت ودخلت.
وتابع زوج علا غانم كاشفًا تفاصيل اعتدائها ووالدتها عليه بالضرب، قائلًا: مفيش دقيقة لقيت علا طالعة وفي إيديها زجاجة وقالت لهم امسكوه واطردوه وطلعوه برا، قولتلها إيه اللي بتعمليه ده يا علا خلينا نتكلم، راحت حدفت الزجاجة وجت في جبهتي، وجه ولد ضخم مسكني وحدفني على الباب وخدت الباب ووقعت والزجاج كله اتكسر، والدتها وهو ماسكني جابت حديدة وضربتني على دراعي وحصلي جرح قطعي 6 سم والعظمة مش في مكانها ومعايا تقرير طبي بـ ده، وقومت أجري أدور على حاجة أمنع بيها نزول الدم من دراعي لأن الدم كان كتير علشان باخد أدوية قلب، دخلت على المطبخ وجبت فوطة وبدأت أدوخ وقعدت على الكرسي.
وأضاف زوج علا غانم: بعد ما الشرطة جت خدوني وخدوا علا ووالدتها والولد اللي فتحلي الباب والولد الضخم، وعملنا محضر وفي القسم بعتوني على المستشفى عملولي تقرير طبي وقالوا لازم تروح النيابة تاخد الإذن علشان نعمل عملية نرجع العظمة مكانها ونخيط الجروح، وروحنا النيابة قعدنا فيها كتير جدًا وأفرجوا عننا ورجعنا القسم وطلبت من القسم إنهم يوصلوني لـ البيت علشان ميحصلش مشاكل بس قالولي مفيش حد في البيت نهائيًا وجيت البيت لقيت الباب مفتوح وقفلت البوابات وطلبت إن مفيش مخلوق يدخل البيت وعلا مجتش البيت.
زوج علا غانم: حسبي الله ونعم الوكيل في أي حد بيقول عليا كلام غلط
وأكد رجل الأعمال عبد العزيز حسن، زوج الفنانة علا غانم، أنه لم يأخذ تفريغ كاميرات المراقبة الموجودة داخل الفيلا، قائلًا: إزاي أنا جبتلها 10 ستات و20 بلطجي ومفيش حد يساعدني واتكسر بالشكل ده وإزاي مش لاقيين تفريغ الكاميرات يثبت ده حق مين، هو أنا هاخد تفريغ الكاميرات إزاي وأنا مضروب، وحسبي الله ونعم الوكيل في أي حد بيقول عليا كلام غلط.
