ياسمين رئيس: بحب يتقال عني حقيقية في شغلي.. ولو اخترت عمل مش مرتاحة فيه بروح أتعالج
أعربت الفنانة ياسمين رئيس، عن حبها الكبير للسينما، مؤكدة أن السينما بمثابة حياة بالنسبة لها، بجانب الحديث عن فيلم لص بغداد وسبب تخوفها من المشاركة به.
وقالت ياسمين رئيس خلال حوارها مع الإعلامية إنجي علي، في برنامج أسرار النجوم المذاع عبر محطة نجوم FM: الأفلام بالنسبة ليا مدرسة بتعلمني الدنيا بيحصل فيها إيه، وكنت بتفرج على الأفلام توديني في دنيا تانية وعالم تاني، وبعدين أقرأ كتب وعن الأماكن اللي اتعمل فيها الأفلام دي، الأفلام كانت بتسفرني بلاد تانية وأنا قاعدة في مكاني.
وأضافت: عندي ولاء للسينما أكتر لأن السينما بتاخد وقت في مشاهدنا أكتر وباخد مساحتي في الإحساس، وتصوير عدد مشاهد أقل بيخليني مركزة أكتر.
وأكدت الفنانة ياسمين رئيس، أنها تُفضل أن يُقال عنها حقيقية في عملها حتى إذا اضطرت لتقديم عمل لا يناسبها، موضحة: بحب يتقال عني حقيقية في شغلي، ودايمًا بشوف إيه اللي أنا مرتاحة فيه وأعمله ولو عملت حاجة وأنا مش مرتاحة بروح بعدها أتعالج، وأنا ببص في ورقتي وبقول يارب خليني كده ماليش دعوة بورق غيري.
ياسمين رئيس: كنت خايفة أعمل فيلم لص بغداد لأن الشخصية دمها خفيف
كما كشفت الفنانة ياسمين رئيس عن سبب تخوفها من تقديم فيلم لص بغداد بطولة الفنان محمد عادل إمام، قائلة: جالي سيناريو أعمله لكن كان هناك مطالبات وضغوطات بالمشاركة فيه بسبب التغيير، ولما عملت الفيلم فوجئت بردود الأفعال، واكتشفت إن المتطلبات دي كانت صحيحة وكان لازم أوافق على الفيلم.
وأضافت: كنت خائفة، ومكنتش عايزة أعمله لأن الشخصية دمها خفيف ودي كانت حاجة جديدة عليا.. لكن الحمد لله كان صح إني لازم اشترك في هذا الفيلم.
