تفاصيل مرافعة قضية محامي كرداسة
تستكمل محكمة جنايات الجيزة اليوم الأحد، جلسة محاكمة محمد. ف، المتهم بـ قتل بنداري، الذي يدعى حمدي بنداري أحمد، الشهير بـ محامي كرداسة، عمدًا مع سبق الإصرار والترصد.
بنداري محامي كرداسة
وطالب دفاع المتهم بقتل بنداري محامي كرادسة، بعرض ابنة المتهم على الطب الشرعي، لتحديد نسبها، ومعرفة هل المتهم والدها، أم أنها نتاج علاقة غير شرعية.
ووصل منذ قليل، محمد فرحات المتهم بقتل بنداري محامي كرداسة، إلى محكمة جنايات الجيزة، لمحاكمته في أولى الجلسات، بتهمة قتل محاميه عمدًا مع سبق الإصرار والترصد.
كما وصلت أسرة بنداري محامي كرداسة، بصحبة المحامي رمضان كشك، المدعي بالحق المدني، وظهرت ملامح الحزن على وجوه الأسرة، التي رفضت بالإدلاء بأية تصريحات صحفية، لحين سماع قرار قاضي الجلسة.
ونشر القاهرة 24 التحقيقات لكشف هوية السيدة التي بسببها اشتعلت الفتنة بين المتهم والمجني عليه، وكيف تعرف عليها المتهم، حيث اعترف المتهم عن علاقته بالمدعوة نورا وكيف تجددت علاقته بها، وقال: أنا بعد ما انضربت بالنار من أهلها وخرجت من المستشفى، وكنت حررت محاضر ضد أهلها، جاتلي البيت وقالتلي إن هي غضبانه من جوزها ومش هترجع لجوزها تاني وعاوزه تتجوزني وأنا قلتلها الكلام ده مش هينفع وخدتها ورحت على بيت خالها.. ولما رحت هناك راح أبوها وأخوها ضربوني وعوروني بمطاوي ودخلت المستشفى والنيابة جت سألتني في المستشفى وقلتلهم على اللي حصل وخرجت وروحت بيتي ولقيت قرايبها جم بيتي ومعاهم الأستاذ بنداري وقالولي إن هي اتطلقت من جوزها وأنت لازم تتجوزها.
وأضاف قاتل بنداري حمدي المحامي: أنا مكنتش راضي والأستاذ بنداري ضغط عليا عشان اتجوزها واتجوزتها، وأنا أصلا خطبتها فترة صغيرة وبعد كده عمي فشكل الخطوبة وكل واحد راح لحاله زمان، ومكنش فيه بينا أي حاجة.. وكانت القضية اللي أنا رافعها ضد أهلها لسه مخلصتش ووقتها كنت عايش أنا ونورا في بيتي ومكنش فيه مشاكل والدنيا كانت عادية وخلفت منها بنتي مريم بعد حوالي تمن شهور ونص.
وواصل قاتل بنداري المحامي اعترافاته قائلا: خلال الفترة دي وقبل ما تولد بحوالي 20 يوما هي خرجت من البيت ومرجعتش تاني فأنا اتصلت عليها قلتلها أنتي فين ومشيتي من البيت ليه؟، قالتلي أن هي في بيت أبوها وبعد ما أولد خد بنتك فقلتلها ليه فقالتلي القضية بتاعة أبويا وأحمد أخويا خلصت وخدوا براءة وقالتلي الأستاذ بنداري هو اللي مرتب الموضوع ده كله عشان قضية أبويا وأخويا تخلص، فبعد ما قالتلي كده اتصلت على الأستاذ بنداري ورد عليا وقلتله هي قضية أهل نورا خدت براءة قالي أه فقلتله هما خدوا براءة إزاي يعني قالي أن نورا راحت شهدت ضدي في المحكمة والموضوع خلص على كدة ورحت طلقتها عند نفس المأذون اللي جوزنا وكانت وقتها ولدت وخدت بنتي عشان ده اللي كنا متفقين عليه وهو ده اللي حصل.
