سمية الخشاب تنصح السيدات: ادلعي وحبي نفسك ومتفتشيش ورا جوزك
تحدثت الفنانة سمية الخشاب، عن عيد الحب، مؤكدة أنها شخصية عقلانية رومانسية وعقلها يتدخل في الوقت المناسب.
وقالت سمية الخشاب في مداخلة هاتفية ببرنامج الستات الذي تقدمه الإعلامية سهير جودة: أنا عقلانية رومانسية وعقلي بيشتغل في الوقت المناسب، ولما أحس أن عقلي لازم يتدخل بخليه يتدخل وبصدقه وبضرب له تعظيم سلام، والحمد لله عقلي تدخل كتير علشان كده أنا لسه باقية على قيد الحياة، وده بعد النضج والخبرات لأني ما كنتش كده.
وأضافت سمية الخشاب: أنا برج الميزان وهما عطائيين أوي ونحانيح في الحب ويموتوا في الرومانسية، اللي بيعرف برج الميزان عارف أنه عطاء جدًا وبيتفنن علشان يسعد حبيبه على حساب نفسه، لكن لما تيجي تحس أنه مش بيبادل بتقلب وتبقى وحشة، وأنا عقلي بيدخل في الوقت الصح وبقول لنفسي لازم تفوقي.
مش بعترف بعيد الحب
وأكدت سمية الخشاب أنها لا تعترف بعيد الحب قائلة: مش بعترف بعيد الحب وأنه يكون فيه يوم معين للحب، لأن اللي بيحب حد بيحبه طول الوقت ويهتم به طول الوقت ولما يلاقي حاجة حلوة يشتريها له ووقتها الهدية هيبقى ليها طعم أحلى كتير لأن الستات بيحبوا الهدايا.
وأشارت سمية الخشاب إلى أن الحب لا يتقتصر على الرجل والمرأة فقط، قائلة: الحب مش حب للراجل والست فقط، ولكن تحبي نفسك وتمتني لكل حاجة حلوة في حياتك وتشكري ربنا طول الوقت، ومش لازم نعلق سعادتنا وفرحتنا على حد في حياتنا، ولكن تقدري تسعدي نفسك وتمتني ليها، ده اللي بقول له لكل الناس لأن مفيش حاجة اسمها وحدة.
وأردفت سمية الخشاب: ولو هجيب هدية لنفسي هتبقى بيجامة عشان الجو البرد، أو برفيوم، أو أي حاجة نقصاني هتخليني فرحانة ومبسوطة، إيه المشكلة يعني، الحياة بسيطة أوي، متوقفوش سعادتكم على حد، حبي نفسك وهادي نفسك، وانبسطي.
سمية الخشاب تنصح السيدات
ووجهت سمية الخشاب نصحية للسيدات قائلة: ما توقفوش سعادتكم على حد حبي نفسك وادلعي وانبسطي، لما تعرفي باس ورد جوزك مش هيفيد بحاجة، لو عاوز يعمل حاجة هيعملها، ليه بتشغلي نفسك الحب مش بيجي كده، أنتِ كده بتضيعي طاقتك وتتعسي نفسك ويجي لك سكر وضغط وتتخني، اتفرجي على فيلم جميل أعملي ماسك اهتمي بجمالك وحالتك النفسية، وأخرجي ما تستنيش واحدة صاحبتك وأشتري حاجات واخترعي حاجات تبسط اعملي طابخة حلوة، أنا بحب نفسي وادلعها وممتنة لربنا، وبعمل ماسكات، وبلعب مع قطتي.
