العُزلة المحببة
في الصعيد وإحنا عيال صغيرة مش أكبر من 10 سنين فيه واحد صاحبنا مات.. مات فجأة بدون مقدمات.. نام ماصحيش.. فجأة "نادر" اللي كان لسه من أقل من 12 ساعة بيلعب، وبيضحك انطفا صوته عن الوجود للأبد، وبدل ما كنا 5 أصحاب وجيران اللي هو تقريبًا مش بنسيب بعض إلا وقت النوم بقينا 4 بس.. فكرة الموت نفسها بالنسبة لأطفال في عمرنا وقتها كانت تخض.. رحنا بيت "نادر" وقعدونا في أوضة صغيرة جنب الباب وكنا كلنا ساكتين لسه مش مستوعبين موته ومحدش فينا فاتح بُقه.. الموقف كان مهيب وكنا سامعين صوت صريخ الناس جاى من بره.. "نادر" كانت والدته متوفية وكان عايش مع والده لوحدهم.. يمكن وفاة والدته كانت سبب رئيسي في اهتمام والده الكبير بيه، واللي بقت علاقته بـ ابنه علاقة اتنين أصحاب أكتر منهم أب وابن.. بقى طبيعي إننا نشوف والده جاى يلعب كورة معانا في الشارع لمجرد إن ابنه طلب منه ده.. أو إنه يعمل له عيد ميلاد مفتخر كل سنة رغم إن ظروفه متوسطة لكن يكون حريص إنه يفسحنا كلنا مع "نادر" في اليوم ده!.. ماكنش غريب كمان إن وأنا واقف في البلكونة أشوفهم بيجروا ورا بعض وهما راجعين من السوق شايلين أكياس الخضار اللي بيقع منهم بسبب الجرى وبيلموه ويكملوا جرى عادي جدًا بعد ما دابت فروق السن بينهم.. تقدر تفهم بسهولة حتى ولو سنك صغير مدى تأثير صدمة زى اللي حصلت على الراجل.. دقايق بسيطة ووالده جه قعد معانا في نفس الأوضة على الكنبة!.. كان واضح إنه حب يهرب شوية من الضغوط ومقابلة الناس والعياط اللي مش بيقف.. والد "نادر" فرد رجله لـ قدام وحط إيديه جنبه وبص لـ السقف وغمض عينه وقال بتنهيدة: (يا الله).. الكلمة طلعت من قلبه مش حنجرته.. كلنا كنا لسه ساكتين.. لف عيونه في وشوشنا كلنا وقال بابتسامة عصية والدموع في عينيه: (الواد "نادر" ضحك علينا ومشي بدري).. هو قال الجملة دي من هنا، وكلنا فتحنا في العياط اللي كان متحوش من هنا.. كان هو اللي بيحاول يهدينا، ويطبطب علينا وفي نفس الوقت كنا فاهمين إنه شايل جواه كتير، وإن ساعات الوحدة اللي هتبدأ من اليوم ده هتبقى تقيلة على روحه.. بعد ساعة خرجنا، ووقفنا على ناصية الشارع.. واحد مننا قال: (مش هنسيبه لوحده).. هزينا راسنا بالموافقة بدون ولا كلمة وكإننا بنعلن إن ده قرارنا كلنا.. اتفقنا إن كل واحد فينا إحنا الـ 4 هييجي يقعد مع والد "نادر" يوم كامل، ومن اليوم الخامس نكرر العملية وهكذا.. الموضوع في الأول واجه اعتراضات من أسرنا بس بشوية مقاوحة مننا الدنيا مشيت، ووافقوا.. بس جزء مش قليل من موافقتهم كان إنهم متفهمين وضع الراجل النفسي، وإن ده آخر وقت ينفع يتساب فيه لوحده.. كل واحد فينا بقى يرجع من المدرسة على بيت "نادر" ويفضل مع والده!.. كنا بنتعامل معاه كإنه أبونا فعلًا أو كإننا "نادر".. مرة حد يخرج معاه للسوق.. مرة حد يجبره يلعب معانا كورة.. اللي قاعد معاه مننا كان يخليه يذاكر له.. يطبخ معاه.. استمرينا على نفس الوضع حوالي سنة بدون تعب، وبدون ما نحدد وقت عشان نوقف اللي بنعمله لإننا كنا مستمتعين بيه.. كان إحساس مبهر بالمسؤولية ماتعرفش جه إزاى من شوية عيال حسوا إن الوحدة هى أكبر عدو على حد كان متونس بوجود شريكه اللي غاب.. والد "نادر" الله يرحمه اتوفى هو كمان بعد 6 سنين كاملين من وفاة ابنه.. لما حكيت الموقف لـ د."أحمد كمال" صديقي وطبيبي النفسي قال لي: (الأعمار بيد الله بس لولا وجودكم معاه، ومحاوطتكم له كانت الصدمة ثم وحدته هتموته بدري عن كده).
• فيه أوقات الناس بتحس بـ الحرية أكتر في العزلة والوحدة بس مش العزلة المطلقة اللي وقتها مفتوح ومالوش نهاية.. بمعنى إن مثلًا مفيش مبدع في أى مجال هيقدر يخرّج إبداعه للنور وهو مش في عزلة!.. الأديب "شكسبير" ألف رائعته مسرحية "الملك لير" أثناء الحجر الصحي في أول القرن 17 وهو في عزلة إجبارية بسبب انتشار الطاعون وقتها في لندن.. الرسام العالمي "بيكاسو" اللي قال: (لا يمكن إنجاز أي عمل جاد من دون العزلة) كان بيتكلم عن تجربة حقيقية من حياته لإنه فعلًا ماكنش بيقدر يرسم أى لوحة غير لما يروح في مكان بعيد مافيهوش أى حد يعرفه رغم إنه أصلًا كان شخصية أسرية ودودة وبيحب اللمة، ده كمان ماكنش بياخد قرار العزلة غير بعد أي مشكلة أو موقف يضايقه يصدر من حد من القريبين منه.. اللي هو إيه ده فلان زعلني طب والله لأدخل في عزلة وأرسم!.. حتى الكاتبة "أوليفيا لينغ" لما انفصلت عن جوزها وهي في الثلاثينات من عمرها سافرت لـ مدينة نيويورك، وكانت الوحدة الإجبارية اللي بقت فيها بتاكل في نفسيتها؛ قررت تخرّج الطاقة اللي جواها في تأليف كتابها "المدينة الموحشة، مغامرات في فن العيش منفردًا" واللي بالمناسبة حقق مبيعات خيالية، لكنها بعد ما انتهت منه خرجت وكملت حياتها بشكل عادي وبمنتهى الإقبال في التعامل مع الناس مع إن جوزها خلّاها تكره نفسها والبشر عمومًا!.. قيس ده برضه في العلاقات بشكل عام.. صدمتك في صديق محتاجة عزلة عشان تفوق منها.. فقدك لشخص عزيز أو فرصة مهمة محتاجين عزلة عشان تتخلص من آثارهم وتبتدي من جديد.. العزلة مش محرمة بس مينفعش تكون إلا مؤقتة.
• مفيش دكتور بيوصف علاج لازم يتاخد العمر كله!.. العزلة مفيدة وصحية كـ خيار مؤقت للشفاء من وضع أجبرتك الظروف عليه لكن مش كـ نمط حياة.. عزلة تعيد فيها ترتيب أوراقك، ومكانة الناس في حياتك.. عزلة تنجز فيها مهمة عمل مطلوبة منك بس لخمتك في دوشة الحياة منعتك تعمل ده.. عزلة تحاول تنسى فيها جرح نفسي أو عاطفي.. الناس بتلاقي نفسها أكتر في وجود ناس تانية حواليهم.. يفضفضوا معاهم.. يضحكوا.. يستمدوا منهم قوتهم أو يكونوا هما نفسهم مصدر قوة ليهم.. حتى لو قررت تنعزل أنت محتاج شخص تقول له إنك قررت تنعزل!.. العزلة شرط بشري ضروري عشان نقدر نكمل، لكن الونس هو اللي يكسب.. الكاتب السعودي "عبدالله العتيبي": (الوحدة لا تعني الابتعاد عن البشر!.. الوحدة هى أن تصبح عاجزًا عن امتلاك ذكريات جديدة).
