المطرب لؤي يبكي أثناء حديثه عن والدته: ضحت بعمرها وصحتها علشاني
تأثر المطرب لؤي خلال حديثه عن والدته، مشيرًا إلى أنها ضحت من أجله ومازالت تضحي، كما كشف لأول مرة تفاصيل عن حياته الشخصية وبداية تعارفه على زوجته اللبنانية.
وقال لؤي خلال لقائه مع الإعلامية ياسمين عز في برنامجها كلام الناس المُذاع عبر شاشة أم بي سي مصر: أنا بحب أمي جدًا، وبستغرب لما أعرف أن فيه حد بيقعد 10 أيام مش بيشوف والدته، ولما كبرت وخلفت اكتشفت أن أمي ووالدي ضحوا بعمرهم وصحتهم علشاني، ولحد دلوقتي بيحسوا بيا لو متضايق، وعندهم حب غير مشروط، أنا عملت مصايب كتير جدا في حياتي ورغم ذلك ساعدوني بكل الطرق علشان أخرج منها، ودول هما أكتر ناس بيخافوا علينا لحد ما يروحوا لـ ربنا.
لؤي يكشف تفاصيل علاقته بزوجته اللبنانية
كما تطرق لؤي للحديث عن علاقته بزوجته اللبنانية، قائلا: أنا مؤمن بالمساواة بين الرجل والمرأة في المشاعر والأحاسيس والحب، وأنا بفتكر مراتي طول السنة مش جاي أفتكرها في عيد الحب بس، ومراتي لبنانية كنا في كلية واحدة وارتبطنا واتجوزنا، وهي صوتها حلو وبتكتب أغاني كمان، وعملت لي أغنيتين قبل كدا، وعملتلي أغنية خاصة بيا يوم فرحنا اسمها «هغني ليك».
أما عن سر استمرار زواجه لـ عدة سنوات، علق لؤي قائلا: أنا اكتشفت أن الكلمة الحلوة والطيبة حسنة وبتفك حاجات كتير أوي والحضن بيصلح حاجات أكتر، والعلاقة الطيبة لازم يكون فيها صدق لأننا في زمن فيه كدب كتير، ولازم الطرفين يقولوا إيه مضايقهم من التاني.
