إيساف: الناس مشاعرها قلت من كتر سماعهم للمهرجانات
كشف المطرب إيساف، رأيه في زيادة سماع أغاني المهرجانات، مشيرًا إلى أن ذلك تعبيرًا عن الواقع.
وقال إيساف: الناس حساباتها عبارة عن أرقام ومش بيبصوا للقيمة، وما ينفعش طول الوقت أقدم مهرجان يرقصك بس، فين المشاعر؟ مفيش حاجة بتخاطب مشاعرك غير الأغاني بتاعتنا إحنا، أغاني إيساف وتامر حسني وهيثم شاكر وعمرو دياب وأحمد سعد وغيرهم الناس دي بتقدم أغاني ليها علاقة بالمشاعر.
وأوضح إيساف: اللي حاصل دلوقتي خلى المشاعر في الشارع قلت، والناس بتشوف جريمة القتل بتحصل والناس مش بتعمل حاجة.
الفن مؤثر جدًا
واستكمل: الفن مؤثر جدا ولما بيكون عبارة عن أديك بالسنجة والكزلك وهي دي الحالة العامة يبقى إحنا في حالة خطر، وأنا عامل أغنية عشان راجل كلها رسالة ونتمنى نقدم نوعية من الأغاني دي، لأن الكم بيفرق.
وواصل: أغانينا أقل من أغاني المهرجانات لأننا علشان نعمل أغنية كصناع أغنية كلاسيك بنقعد شهرين هما بيعملوا عشرين أغنية في شهرين، لذلك بناشد زملائي إننا نجتهد أكتر ونعمل أغاني أكتر علشان نقف مع بلدنا والشعب، والناس تبدأ تحس تاني وتعيط على أغنية وتحب على أغنية.
وأضاف إيساف: أنا لما كنت بدخل في علاقة ويحصل معايا فراق كنت بطلع الطاقة السلبية اللي جوايا من خلال أني أسمع أغاني لهشام عباس ومصطفى قمر ومحمد فؤاد وعمرو دياب، دلوقتي اللي بيحصل معاه كده بيجيب سكينة ويدبحها في وسط الشارع أو مدخل عمارة لأنه ما طلعش الطاقة السلبية اللي جواه.
وتابع: مين فينا ما دخلش علاقات وفشل كلنا كنا بنسمع أغاني وبنطلع الطاقة السلبية في أغنية دلوقتي هيطلع يسمع مهرجان ياخد سكينة ويقتلها.
وأردف: لازم نكتر عدد أغانينا، واللي فاهم اللعبة دي عمرو دياب وبحيي على ده لأن الكم بيفرق وهو فاهم ده.
