ميدو: خسارة الأهلي أمام الهلال مش نهاية العالم.. وبلاش ندبح الشناوي
علق أحمد حسام ميدو، نجم الكرة المصرية السابق، على خسارة الأهلي من الهلال السوداني بهدف دون رد في إطار منافسات دور المجموعات لدوري أبطال أفريقيا هذا الموسم.
تصريحات أحمد حسام ميدو
وقال ميدو في تصريحات تليفزيونية: خسارة الأهلي أمام الهلال ليست نهاية العالم كما يصورها البعض، وإنما خسارة بها العديد من الفوائد التي تجعل الأهلي يتعلم.
وأضاف مدرب الإسماعيلي: الأهلي كان لا بد أن يكون ذكيا في إبعاد اللاعبين عن الصراعات البدنية، والابتعاد عن ارتكاب الأخطاء على حدود منطقة الجزاء، وبخاصة أن اللاعبين السودانيين أقوياء بدنيا جدا.
وأردف ميدو: مشوار الأهلي في دوري الأبطال لا يزال طويلا، ولكن مباراة صن دوانز المقبلة بالنسبة للأهلي هي مباراة عنق زجاجة، وإذا أردت التأهل عليك أن تفوز على صنداونز الذي حقق فوزين من أصل مباراتين، ولا تتعادل معه.
وأكد أحمد حسام ميدو، أن محمد الشناوي حارس الأهلي يتحمل مسؤولية هدف الهلال في شباك الأهلي خلال منافسات دور المجموعات لدوري أبطال أفريقيا، ولكنه رفض فكرة ذبح الحارس.
وواصل ميدو في تصريحاته: الشناوي يتحمل مسؤولية هدف الهلال في شباك الأهلي، كان لازم وقفة الشناوي تبقى أفضل من كدة ولكن وقفته صعبت المهمة عليه، والفاول ده ميدخلش في حارس دولي كبير زي الشناوي، وبداية وقفته من الأول غلط.
وأكمل مدرب الدراويش: كان لازم الشناوي يبقى واخد نص خطوة لبرا، ده كان هيسهل عليه المهمة جدا، لكن هل ده معناه إن الناس تدبح الشناوي؟ لا مفيش حارس مش بيغلط، ومش بتكلم كده دفاعا عن الشناوي، لكن دفاعا عن مبدأ كرة القدم، الشناوي الفترة اللي فاتت كلها باستثناء مباريات كأس العالم للأندية لأن منافسين الأهلي كانوا مميزين ومستويات صعبة، ماشي كويس في معظم مباريات الدوري، والشناوي شايل الأهلي في ماتشات كتير جدا.
واختتم ميدو: الشناوي شايل الأهلي في ماتشات كتير، وبيصد ركلات جزاء وانفرادات صعب أي حارس يشيلها في مصر، وبلاش السكاكين تكتر حوالين الشناوي وسهل جدا يشيل الليلة لوحده، لكن ده ظلم، الشناوي غلط فعلا في وقفته قبل الهدف، ولكن مينفعش يشيل الماتش لوحده.
