دعاء فاروق عن مسلسل أزمة منتصف العمر: انتهى والستاير السودا نزلت.. أحداثه كحلي
علقت الإعلامية دعاء فاروق، على أحداث مسلسل أزمة منتصف العمر، مؤكدة أن المسلسل الذي يٌعرض على منصة شاهد قد انتهى بعد الحلقة الـ 12.
تعليق دعاء فاروق على أزمة منتصف العمر
وقالت دعاء فاروق في منشور لها على صفحتها الشخصية بـ فيس بوك: طيب يا جماعة حد مستني النهاية في سواد منتصف المستنقع اللي بنتابعه، أنا بالنسبة لي وبالأصالة عن نفسي كده جاب الناهية خلاص فاضل 3 حلقات أو حتى 10 دي كلها شكليات، المسلسل خلص والستاير السودا نزلت.
موتوا بصيص الفرحة
وأضافت: موتوا بصيص الفرحة الوحيد، وقتلتوا سرسوب أي أمل كنا مستنيينه يظهر، حد يفكرني كده هو كريم فهمي كان زعلان إن الناس متضايقة، من الأحداث الكحلي اللي بتحصل وبيقول علينا لمؤاخدة لجان، ألا هو انت يا كريم كنت عاوزنا نتابع المسلسل ونفرح، هل كنت مستني الناس تتبسط بالأحداث مثلًا، لا بص يا كريم غالبا حصل عندك لبس في الموضوع أنت المفروض تتبسط أننا بنتابع، وتفرح أننا بنتفرج وكفى، وده قمة النجاح اللي يلزم أبطال العمل، إن المسلسل متشاف وشكرًا، تمثيلكم كلكم رائع وشكرًا، ومحدش قال أنكم مش بتمثلوا هايل كلكم بتلعبوا في الأهلي يا سيدى.
جبتوا الثقة دي منين
وواصلت: وبعد الحلقة الـ12 اللي بليتونا بيها أنت وريهام، ورنا رئيس ورشدى المهدى وعمر السعيد تقدروا تحترفوا في ليفربوول بجدارة، إنما مفهمتش هل انت كنت عاوز الناس تشكر في الأفعال غير المبررة، اللي بتعملها الشخصيات الحزينة دي، منين جبتوا الثقة دى مفهمتش حتى لو موجودة في الدنيا، حد قالك إن احنا بنسقف لهم.
واستكملت فاروق: حد اتبسط مثلًا لما البنت بتاعت بورسعيد قتلت أمها بالاشتراك مع صاحبها، حد كان فرح لما الواد قتل نيرة أشرف، ماحنا عارفين والله العظيم إن المجتمع فيه أمراض نفسية، وأفعال كتير غير مبررة، والدراما ممكن تنقل ده، بس لما نتفرج على الأفعال المريضة، اللي وراها أمراض نفسية متلتلة، لازم الناس تستنكر وتضايق وتكتب وترفض وتشجب وتنتصر للأفعال السوية وللناس الأسوياء.
وأردفت: كريم اتضايق جدًا إن بعض الناس، قالوا إن فيه زنا محارم، وهم لسة مشافوش المسلسل لآخره، طيب أحنا آسفين يا كريم، طلع زنا بس المفروض الناس تسقف يعني للعلاقة غير السوية، اللي بين فيروز وعمر، ماتسيبوا الناس ترفض يا أخي براحتها هي بترفض عمر غير السوي اللي خرب الدنيا، الناس ما رفضتش كريم ولا غلطت في كريم.
وأوضحت فاروق: طبيعي الناس ترفض التصرفات غير المبررة، وترفض الزنا غير المبرر بين فيروز وعمر وأي محاولات تبرير، أو تعاطف من عينة أصلها مش أمها، أصله طلقها، ده نقوله عند الدكتور النفسي، بقي لو ظبطنا نفسنا بنقول كده لأننا هنبقي عاوزين حاجة مش طبيعية تحصل الطبيعي أن الناس ترفض محاولات النصب لزياد، وترفض ضربه لمراته وترفض تصرفات عزت مع فيروز.
وواصلت: ده أكتر واحد مريض نفسي، في العيلة بالعملية اللي عملها، وبالسر غير المبرر لما خبى على بنته إن أمها ماتت صحيح قطع قلبي، في الحلقة الـ12 اللي اتنكدت بسببها وشايفة، أنها نقلت المسلسل، من منطقة الساسبنس لمنطقة سواد غميقة ضايقتنا جدًا، وقبضت قلبنا، وأنا هنام متنكدة النهاردة يا أساتذة بسببكم.
واختتمت المنشور قائلًا: خدوا أنتو النجاح، وسيبونا نعبر عن النكد والسواد اللي اتسببتوا فيه، اتبسطوا بالترندات والبوستات والمقالات والفيديوهات، حتى لو بتشتم في الأشخاص والأفعال، لأنهم لازم يتشتموا كلهم، ولا تحبوا بالمرة نسقف لسلمى المدمنة ونزرغط لياسمين اللي ماشية تصطاد رجالة كبار، سيبونا بقى في الوحلة اللي وحلتونا فيها مش عارفين نخرج من مستنقع منتصف العمر النيلة.
