حفيدة محمد عبد الوهاب: والدتي توفيت بعد جدي بـ 11 يوما.. وأول مرة نسمع إن عنده فيلا
كشفت زينب أباظة، حفيدة الموسيقار محمد عبد الوهاب، تفاصيل لأول مرة عن حياته، مشيرة إلى أن والدتها توفيت بعد جدها بـ 11 يومًا فقط.
وقالت زينب أباظة، خلال لقائها ببرنامج الستات: أنا بكون سعيدة لما الناس بيتكلموا عن عبد الوهاب وبيحكوا قد إيه هما بيحبوه ودي حاجة بتسعدني، ولكنها مسئولية كبيرة إني حفيدته؛ لأني لازم أحترم تاريخه ودي ضريبة الشهرة، وأن محمد عبد الوهاب ملك للشعب كله مش ملكنا بس كـ عائلته.
وأضافت زينب: أنا كنت في أمريكا لما عرفت خبر وفاة جدي وكل الناس العرب هناك والمصريين عزوني وكنت متأثرة جدا بوفاته لأني أكتر واحدة من الأحفاد لحقته واللي بعدي كانوا صغيرين، وكان بالنسبالي حاجة كبيرة، وأمي اتوفت بعده بـ 11 يوما في عز شبابها ولا مريضة ولا حاجة ولكنها تأثرت بوفاته وكتمت، وكانت واقفة في العزاء كويسة وفجأة ماتت، وهما كانوا مرتبطين جدًا وكنت بشوف حب كبير بين أمي وجدي وكانوا أصحاب.
أزمة فيلا محمد عبد الوهاب
كما تطرقت زينب أباظة للحديث عن أزمة الفيلا التي عرضت للبيع منذ عدة أيام وزعم أصحابها بأنها فيلا عبد الوهاب، قائلة: مكنش عندنا فكرة عن الفيلا بتاعته ولا كانت مكتوبة في الورث وفيها مقتنيات بس مش بتاعتنا، ولسه بنعمل تحريات عنها، وممكن حد يكون بيعمل بروباجندا على اسمه وبيقول إن عبد الوهاب كان عايش فيها، وحتى أهلي الكبار منهم وولاده قالوا عمرنا ما شوفنا الفيلا دي يعني مش إحنا بس كـ أحفاد لأ دا الكبار كمان ميعرفوش حاجة عنها.
