المخرجة بتول عرفة عن مبادرة إحياء المسرح المدرسي: كلنا ولاده.. محدش رفض من الفنانين
كشفت المخرجة بتول عرفة، كواليس مشاركتها في مبادرة إحياء المسرح المدرسي التي أطلقتها وزارة التربية والتعليم مؤخرا.
وتحدثت المخرجة بتول عرفة عن تفاصيل مشاركتها في مبادرة إحياء المسرح المدرسي، وذلك خلال لقائها ببرنامج صاحبة السعادة، قائلة: الموضوع بدأ من سنة وشهرين تواصلت معانا وزارة التربية والتعليم والشركة المنتجة علشان المبادرة، ولقينا نفسنا كلنا ولاد المسرح المدرسي، والموضوع بدأ مع كل شخص وهو صغير.
وأضافت بتول عرفة: المدرسة كانت بتوجهك علشان تطلع أحلى ما فيك، فكان خبر لطيف جدًا بالنسبالنا، وأول حاجة وقفنا عندها هنقول إيه في أول عرض، واتكلمنا عن حاجات جديدة على الجيل ده، وبصيت للدكتور مدحت قولتله الله يكون في عونك، ابتدينا نتكلم في إن الطفل بتاع 2022 و2023، صعب إني أجذبه للمسرح، ومن هنا جت فكرة نتكلم عن تاريخ مصر، بطريقة مختلفة، إن إحنا نحكي عن تاريخنا بالشكل الجديد ده.
بتول عرفة توجه الشكر للفنانين المشاركين في مبادرة إحياء المسرح المدرسي
واختتمت بتول عرفة قائلة: الفنانين كلهم اللي كلمناهم محدش رفض، يسرا، كارول سماحة، أكرم حسني، محمد فراج، الشرنوبي، حنان مطاوع، أسماء أبو اليزيد، بلاك تيما، كورال الشرق، ومعانا 3 أجيال مش نجوم كبار فقط، والنجوم تعاملوا مع الأطفال بشكل جميل، ويسرا أول ما جت كانت جاية من تصوير 19 ساعة، وقالت مش هطول النهارده، شافتهم قعدت 4 ساعات، فكانوا مدين طاقة للأطفال تجنن، وخدت حلقة من برنامج إسعاد يونس، اسمها ريتال.
