والدة ضحية المعادي في التحقيقات: السواق كان معاه بنت في العربية ومكنش مركز في الطريق | خاص
كشفت التحقيقات في واقعة دهس الشاب محمد ضياء أثناء عبوره الطريق، من قبل سيارة تسير بسرعة جنوينة، يقودها شاب متهور بشارع الخمسين في منطقة زهراء المعادي بالقاهرة، تفاصيل جديدة حول الواقعة.
دهس الشاب محمد ضياء
حصل القاهرة 24 على التحقيقات في قضية دهس محمد ضياء التي حملت رقم 18392 لسنة 2022، وألقت الأجهزة الأمنية القبض على المتهم وتمت إحالته إلى جهات التحقيق، التي استدعت والدة الشاب محمد ضياء وجاءت أقوالها كالآتي:
أنا ياسمين محمد والدة الضحية محمد ضياء، وأعمل ربه منزل سني 43 سنة، اللي حصل إن جالي تليفون يوم الواقعة من أصحاب ابني محمد ضياء، بيقولوا انه فيه عربية خبطته وهما دلوقتي طالعين بيه على مستشفى مبرة المعادي في الإسعاف، روحت على المستشفى وهناك عرفت أنه اتوفى علشان في واحد كان سايق العربية بسرعة فخبطه، وعرفت من أصحابه إن الولد اللي خبطه كان معاه بنت في العربية، وتقريبا هي اللي كانت شغلاه وهو بيسوق بسرعة وكان بياخد غرزة ومش في باله اللي قدامه في شارع الخمسين بالمعادي، وروحنا على القسم علشان نكمل الإجراءات القانونية.
المتهم كان معاه بنت في العربية ومكنش مركز في الطريق
وتابعت والدة محمد ضياء: أنا لما وصلت المستشفى، قالولي إن ولدي وواحده ثانية واحد خبطهم بالعربية وهما بيعدوا الطريق على الكورنيش، هو كان خارج مع أصحابه، وآخر مرة شوفته فيها امبارح الصبح قبل ما ينزل وكانت حالته الصحية جيدة وكان كويس جدا، ومعرفش إذا كان تعمد يخبط ابني، بس أصحاب ابني بيقولوا انه كان معاه بنت في العربية فهو مكنش مركز في الطريق.
واتهمت والدة الشاب محمد ضياء، السائق بالتسبب بالخطأ في وفاة نجلها، وطالبت باتخاذ الإجراءات القانونية ضده.
