ليلى زاهر: هشام جمال هو اللي خلاني أغني.. ووالدي أصر على تصوير كليب كلمة أخيرة
كشفت الفنانة ليلى أحمد زاهر كواليس أولى أغنياتها بعنوان كلمة أخيرة، والتي طرحتها الفترة الماضية وحققت من خلالها نجاحا كبيرًا.
وقالت ليلى أحمد زاهر عن أغنية كلمة أخيرة، وتفاصيل تعاونها مع الملحن إسلام زكي، خلال حوارها مع برنامج ET بالعربي: أنا دايمًا بيكون عندي قلق قبل أي عمل جديد ودي حاجة طبيعية، ومن ساعة ما تعاونت مع الملحن إسلام زيك في مسرحية عيلة لاسعة جدًا، ولقينا إن فيه كيمياء بينا، وذوقنا شبه بعض في المزيكا، فاتبسطنا أوي وقولنا لازم هنشتغل مع بعض تاني، وفي يوم كلمني وقالي يا ليلى أنا عندي أغاني عايزك تسمعيها، وفي أغنية أنا محتاج بجد أسمعهالك وتغنيها، ومش شايف حد غيرك يغنيها.
ليلى زاهر: كنت فوق توقعات الملحن إسلام زكي
وتابعت ليلى زاهر، أن أداءها الغنائي فاق توقعات الملحن إسلام زكي، موضحة: روحت لـ الملحن إسلام زكي تاني يوم وسمعت أكتر من أغنية وكان منها أغنية كلمة أخيرة وهو كان متأكد إني هختارها، وقالي يلا نسجل؟ قولتله لأ أنا خايفة لأن الأغنية صعبة وتقيلة، وهو قالي لأ أنا واثق فيكي وعارف إنك هتعرفي تغنيها وهتعمليها حلوة أوي ومش شايف حد غيرك يغنيها، وتعالي نجرب لو مش حلوة نعمل حاجة تانية، وهو تفاجئ بيا وقالي إن فوق توقعاته وطول الوقت كان بيشجعني.
وأكدت ليلى زاهر، أن وجود والدتها ودعمها لها خلال تسجيل أغنية كلمة أخيرة، فرق معها نفسيًا وفنيًا، قائلة: وأنا بسجل الأغنية كان معايا ماما وملك أختي، وماما ودنها موسيقية أوي وهي بتخليني أطلع إحساسي أوي ووجودها معايا اليوم ده فرق معايا أوي.
وأضافت ليلى زاهر: بابا كان مُصر إن الأغنية دي تتصور فيديو كليب وكان بيحارب علشان تتصور وقالي والله ما هتنزل غير لما تتصور.
ليلى زاهر: هشام جمال هو اللي خلاني أغني وبثق في رأيه
أما عن إخراج هشام جمال لـ فيديو كليب كلمة أخيرة، فعلقت قائلة: أنا باخد رأي هشام جمال في كل حاجة وبثق في رأيه جدًا، وهو أول حد وقفني أمام مايك وخلاني أغني، ولما سجلت الأغنية سمعته وكنت عايزة رأيه، ولما سمع الأغنية قالي لو هتتصور أنا هخرجها ليكي.
