بيتر ميمي عن مسلسل بالطو: حصلتلي نفس المواقف وأنا طبيب.. وكنت هتعرض للقتل
كشف المخرج بيتر ميمي العديد من تفاصيل حياته كـ طبيب قبل دخول عالم الفن، مؤكدًا أن مسلسل بالطو الذي يعرض حاليًا عبر منصة watch it يعبر عن المواقف التي تعرض لها.
وكتب بيتر ميمي عبر حسابه بموقع التواصل الاجتماعي فيسبوك: اللي بيحصل في مسلسل بالطو كان بيحصلي زمان بالظبط، أنا استلمت تكليف سنة 2012 على أساس أني طبيب ثالث في إحدى الوحدات الصحية بالبدرشين، وللأسف بعد أسبوعين في الوحدة لاقيت نفسي مدير الوحدة ومفتش الصحة وأنا عندي 24 سنة ومش عارف منين يودي فين.
وواصل بيتر ميمي: كان بيعدي عليا حاجات غريبة، مرة واحدة قرصها عقرب دخلت عليا وجايبة العقرب معاها، ويوم جالي واحدة مشربة بنتها اللي عندها أسبوعين لبن جاموسة ومرة اتخانقت مع أهل مريض والممرضة قالتلي متجيش بكرا عشان دول ناس صعبة ممكن يقتلوك، ومرة حد ضرب حد بسكينة وأهله مسكوني ضربوني أنا عشان مش لاقيين الواد اللي ضربه بالسكينة، ده أنا اضربت ضرب مخدهوش جدي في فيلم بوحة، كل ده وعندي 24 سنة.
مسلسل بالطو
ويذكر أن مسلسل بالطو يضم العديد من الفنانين والوجوه الشابة، من بينهم عصام عمر، سلافة غانم، ومريم الجندي، والفنان محمد رضوان ومحمود البزاوي وعارفة عبد الرسول، كما ظهر الفنان محمد لطفي كـ ضيف شرف خلال أحداث المسلسل، وهو من تأليف أحمد عاطف فياض، ومن إخراج عمر المهندس.
