أحمد التهامي عن أزمة فيلم تاج: مش معقول توارد الأفكار يكون بالتقارب ده.. وهاخد إجراء قانوني بعد عرضه
أعرب الفنان أحمد التهامي، عن استيائه الشديد من الفنان تامر حسني بسبب عدم التواصل معه بعدما زعم تشابه فيلم تامر الجديد بعنوان تاج، مع قصة فيلم أحمد التهامي الذي لم يرَ النور بعد، مؤكدًا أنه لن يتخذ أي إجراء قانوني قبل عرض فيلم تاج، ومقارنته بـ فيلمه.
أزمة فيلم تاج لتامر حسني
وقال أحمد التهامي، خلال لقائه مع برنامج MBC Trending: أنا لما قرأت موضوع الإعلان بتاع فيلم تامر حسني قعدت يومين تعبان جدًا، واكتأبت جدًا إن حلمي بيتاخد أو بيضيع، وفكرة البطل الخارق هي قريبة مني وقولت أكيد هعملها كويس وبقيت أفكر في الحكاية تتعمل إزاي، لقيت إن لازم يكون فيها جزء يجذب الناس، فافكرة إن يتعمل حدوتة فيها اتنين إخوات تؤام واحد بطل خارق، والفيلم اللي أنا كاتبه اسمه خِلف خلاف، وفعلًا سجلت الفكرة في الرقابة والشهر العقاري في 2017.
وأردف أحمد التهامي: بدأت أسعى للموضوع في شركات الإنتاج الكبيرة، وأنا بسعى كان معظم الناس بتقول دي فكرة بعيد أوي عننا ومش هتحقق إيرادات وتكلفتها عالية.
وأكد الفنان أحمد التهامي أنه حاول بشتى الطرق أن يتواصل مع الفنان تامر حسني، موضحًا: كلمت ناس حوالين تامر حسني، وناس من شركة الإنتاج إن هما يوصلوني بيه، ولكن ملقتش رد من تامر وده زعلني، وجالي رد من الجهات الإنتاجية بيقولولي إن تامر زعلان، أنا مغلطتش في تامر، بالعكس أنا اللي زعلان أنه مكلمنيش يعرف إيه الموضوع أو نقعد مع بعض، بالعكس قالولي أنت ممكن تروح الرقابة إذا كان الموضوع متشابه ولا لأ.
وأضاف أحمد التهامي: من حق أي حد يعمل أي حاجة طبعًا، وتامر حسني فنان كبير جدًا وأنا بحبه، وأنا مستني طرح الفيلم وأنا مقدرش أقول أي حاجة ولما نزلت البوست كان علشان أنا مش عايز ألجأ للحاجات القانونية، أو أزعل صحابي وزملائي مني، إحنا فنانين في الأول والآخر، ومش بنتكلم على شركات إنتاج وماديات، بنتكلم على الفكرة وحقوق الملكية الفكرية، وأنا مكنتش عايز أدخل في صدام، ولا ألجأ للشئون القانونية وأكبر الموضوع، بالعكس.
أحمد التهامي: مكنتش أعرف أن تامر حسني هو اللي بيكتب فيلم تاج.. ومش معقول توارد الأفكار توصل بالتقارب ده
واستكمل أحمد التهامي حديثه، أنه في حال عدم تطابق الفيلمين، سيقدم اعتذارًا للفنان تامر حسني، قائلًا: لو طلع الفيلمين مختلفين هقدم لـ تامر حسني اعتذار، وأنا مكنتش أعرف أن تامر هو اللي بيكتب الفيلم، وقولت لو هو اللي بيكتب الفيلم يبقى مايعرفش أي خط من خطوط العمل وحد وصل له ده، لأني قولت أن فيه ناس مؤذية كتير وعايزة تحرق الفكرة بتاعتي، وقولت مش معقول توارد الأفكار توصل بالتقارب ده أوي، وطبعًا الموضوع يضايق ولكن أنا مش عايز أسبق الأحداث وأخد إجراءات قبل ما أشوف الفيلم.
أما في حال تطابق قصة الفيلمين، فهل سيتخذ أحمد التهامي إجراء قانوني ضد الفنان تامر حسني؟ فعلق التهامي قائلًا: فيه حقوق ملكية فكرة، ولام يتاخد فيه خطوة لأن دي من حقي.
واختتم أحمد التهامي حديثه موجهًا رسالة لـ الفنان تامر حسني، قائلًا: وبقول لـ تامر حسني أنا بحبك على المستوى الفني والشخصي، وكنت مبسوط إني اشتغلت معاك، ومفيش أي حاجة على تامر وحشة، وتامر نجم كبير وناجح، وكنت أتمنى أنه يكلمني ونشوف هل فيه تقارب في القصة ولا لأ.
