ما فعله البالون

من كام أسبوع فاتوا فيه مجموعة من الشباب في أمريكا وتحديدًا في ولاية أوهايو متعودين يروحوا نادي ترفيهي قريب من بيوتهم مرة كل أسبوع.. الخروجة دي كانت بتبقى هي الفُسحة اللي بيشوفوا فيها بعض وبيتخلصوا من زحمة ورخامة الأسبوع كله وبتخليهم مؤهلين للأسبوع اللي بعده وهكذا.. طب إحنا هنقعد ونعمل إيه؟.. هندردش؟.. هناكل؟.. هنهزر؟.. عظيم ده كله حلو ولطيف بس برضه محتاجين شوية حاجات مطرقعة يكسروا الملل!.. عايزين تجديد!.. أيوا ما أنتم في النادي على طول ودي الوسائل المتاحة للترفيه في النادي.. إيه رأيكم تخرجوا بره وتغيروا المكان لمكان تاني مختلف؟.. لأ يا عم إحنا بتوع أنتخة ومش بنحب نكتشف أماكن تانية فخلينا في اللي نعرفه أحسن بس نحاول نعمل شيء مختلف وإحنا هنا!.. فكروا يمين وشمال وبعد فترة قدروا يوصلوا لحل.. إحنا هنجيب بالون طائر بسيط ونلعب بيه!.. يا سلام!.. هو جه اللي هيضيع الملل والرتابة يعني!.. أيوا.. البالون الطائر ده شبه الطيارات الورق عندنا هنا بس الفرق إنه أكبر شوية والهيكل بتاعه من البلاستيك مع شوية هيليوم فبيخلوه يطير وممكن التحكم فيه بالريموت كونترول كمان!.. حلو.. الأحلى كمان إن سعره بسيط حوالي 12 دولار!.. يعني تقريبًا ببلاش!.. جابوه وبدأوا يتسلوا بيه ويطيروه.. الموضوع عيالي شوية بس أهو حاجة مختلفة!.. الفكرة إن من كام يوم وأثناء لعب الشباب دول بالبالون فقدوا السيطرة عليه وطار لبعيد!.. إجرى وراه وحاول تجيبه يا عم منك له.. ماقدروش.. والنتيجة؟.. البالون بسبب الهوا ارتفع لمسافة بعيدة واتحرك لفوق لحد ما اختفى عن الأنظار.. خلي بالك ما هو برضه رخيص أنت مش مشتري طيارة فانتوم يعني ده يادوب بـ 12 دولار أول عن آخر!.. الشباب استقبلوا اللي حصل بشوية زعل وبعدها نسيوا وأهو خلينا نشتري واحد تاني أو حتى ندور على شيء جديد تاني يسلينا مش هنغلب.. الغريب في الموضوع إن البالون ظهر في منطقة تانية بعدها بكام ساعة وكان شكله غريب بالنسبة للناس اللي شافوه في المنطقة التانية دي باعتباره شيء طاير على مسافة مش عالية ولا منخفضة لكن متوسطة ومحدش فاهم ده إيه ده!.. الناس اللي شافوه بلغوا الشرطة!.. الحقونا فيه جسم طائر لمخلوقات فضائية طاير فوق البلد عندنا.. مخلوقات فضائية!.. يا نهار أزرق.. الدنيا اتقلبت في أمريكا وخرجت طيارات تابعة للقوات الجوية الأمريكية عشان تشوف القصة دي.. فعلًا شافوا البالون ورصدوه وجت الأوامر بالإنتظار لحد ما يبقى فوق منطقة غير مأهولة بالسكان ثم تفجيره!.. مع إنهم ممكن كانوا يتابعوه لفترة ويشوفوه إيه ده وأكيد مليون% كانوا في لحظة من اللحظات هيكتشفوا إنه فنكوش يعني ومجرد لعبة بس لأ.. الأوامر إن يتم متابعته من مسافة تحسبًا لأي حاجة تحصل ثم تفجيره بالصواريخ!.. للأسف الكوميديا دي حصلت فعلا.. حصل اللي تم الأمر بيه وأطلقت طيارة حربية أمريكية صاروخ على البالون ودمرته في أقل من ثانية!.. إيه الجنان ده!.. صاروخ عشان بالون لعبة من البلاستيك.. تخيل!.. الإفيه في الموضوع إن سعر الصاروخ كان 400 ألف دولار أمريكي!.. يعني بنتكلم في بسعر النهاردة بالجنيه المصري 12 مليون جنيه وربع!.. في حين إن سعر البالون اللعبة زي ما قولنا 12 دولار.. يعني بالمصري 370 جنيه تقريبًا!.. ودي كانت أغبى ردة فعل في التاريخ.. تصرف 12 مليون جنيه عشان تتخلص من شيء قيمته 370 جنيه!.

عدم الحكمة في تقييم حجم الفعل اللي حصل معاك ممكن يخليك تاخد رد فعل أكبر منه!.. للأسف فيه ناس كتير بردود أفعالهم القاسية بيظلموا غيرهم خصوصًا لما يكون الفعل الأصلي مش بنفس القوة.. رد الفعل لما بيبقى أكبر من الفعل نفسه بتبقى تلكيكة مش أكتر لشخص مقرر البُعد لكنه كان منتظر الغلطة عشان يغطي قراره بشوية منطق من وجهة نظره!.. في كل الأحوال "الهجر" هو الإجابة النموذجية لأي مكان أو شخص يصدر منهم فعل مايعجبكش.. "الهجر" مش "الرد".. لكن لو فيه رغبة في الرد يبقى الكلمة ردها كلمة زيها.. الفعل رده فعل قده.. حاجتين بس مسموح فيهم إن رد فعلك يكون ضعف الفعل.. الأولى هي إن البُعد = بُعدين.. والتانية هي الخير.. الكلمة أو الفعل الحلوين ثمنهم كلام وأفعال حلوة.