مؤلف أزمة منتصف العمر: لو كانت نهاية الأحداث سعيدة الناس هتلومني.. والهدف الرئيسي التوعية
تحدث أحمد عادل سلطان مؤلف مسلسل أزمة منتصف العمر، عن أحداث الحلقة الأخيرة من العمل وعن الانتقادات التي لاحقت العمل منذ بداية عرضه.
وقال أحمد عادل سلطان في تصريحات لـ القاهرة 24، إنه تقبل فكرة النقد لأن العمل جديد على الجمهور، موضحًا: أنا متقبل فكرة النقد اللي قابل المسلسل، بس أنا متفهم إن أي حاجة جديدة بتتعرض على المشاهد فهو أول حاجة هيقولها لا، يعني هو يحب يعيش في الأمان اللي هو عايش فيه ويتفرج في الحاجات اللي هو متعود عليها.
وأضاف: أي حاجة جديدة هيقول عليها لا بس في الآخر هتعجبه وهيتفرج عليها، ولما تتعمل حاجات شبه كدا مرة واتنين وتلاتة هيتعود عليها، ولكن عشان هو جديد على المشاهد فلازم طبعا المسلسل يقابل انتقادات، ولكن فيه نقد ما ببصلوش خالص اللي هو بيقول حاجات ملهاش علاقة بالمسلسل بس النقد سواء على جرأة الموضوع أو الأفكار اللي بتتقدم في الموضوع أنا متفهمه لأن فعلًا الموضوع جريء.
الحلقة الأخيرة من أزمة منتصف العمر
وعن أحداث الحلقة الأخيرة، أكد أحمد عادل سلطان أن كل شخصية في العمل لقت عقابها بعد كمّ الأخطاء التي حدثت خلال الأحداث، مشيرًا إلى أن هدف العمل توعية الجمهور لعدم فعل أحداث مشابه للعمل، موضحًا: الجمهورلـ وهلة فكر أن فيروز وعمر حياتهم هتبقى حلوة بعد ليلة العشاء.
وأردف: لو نهاية فيروز وعمر بقت سعيدة كانت الناس تيجي تلومني لو أنا بقدم فكرة وحشة في المسلسل، إنما لا، أعوذ بالله، أنا بقدم فكر غلط وبقول للناس إوعى تعمل كدا عشان نهاية اللي بيعمل كده بتكون نهاية وحشة، ومفيش ولا شخصية في المسلسل شافت يوم عدل حتى لو عمل غلطة واحدة، لأن فعلًا غلطة واحدة ممكن تهدلك الحياة كلها.
رد فعل الجمهور على أزمة منتصف العمر
وأكد أحمد عادل سلطان أنه توقع رد فعل الجمهور ونجاح العمل بسبب الأحداث الجديدة التي طرحت في العمل، مضيفًا: كنت متوقع نجاح العمل ومن أول ما كنت بكتب أحداثه كنت متوقعله إنه يروح في الحتة دي؛ لأن الموضوع جديد على الناس، والناس بتحب تتفرج على أي حاجة جديدة حتى لو هتشتم.
الجزء الثاني من أزمة منتصف العمر
وكشف أحمد عادل سلطان عن تفاصيل الجزء الثاني من مسلسل أزمة منتصف العمر، مؤكدًا أنه سيبدأ كتابته قريبًا، مشيرًا إلى أن الجزء الثاني أحداثه منفصله ومختلفة عن الأول، معلقًا: الجزء الثاني ملوش علاقة بالجزء الأول خالص، هو نفس الاسم بس ملوش علاقة بأي حاجة خالص، هيبقى عامل زي سلسلة، كل جزء بيحكي عن حاجة معينة ومختلفة.
