عمرو أديب يهاجم منتقدي بوستر مسلسل منى زكي: الحجاب في مصر زي أخلاقي واجتماعي وبحترم أي فتاة محجبة
انتقد الإعلامي عمرو أديب مهاجمي مسلسل منى زكي تحت الوصاية بعد طرح بوستر العمل، حيث انتقد البعض ظهور منى زكي بالحجاب مع حواجب ثقيلة وقال البعض إنها تشوه صورة المحجبة.
وقال عمرو أديب في برنامجه الحكاية المذاع عبر إحدى الفضائيات: الحجاب فرض، وأنا مقتنع بكده وبحترم أي فتاة محجبة، هو مفيش محجبة شريرة؟
وأضاف: في مصر الحجاب زي أخلاقي واجتماعي يعني في أماكن في مصر الست لازم تمشي وهي محجبة وده أمر اجتماعي واضح جدًا، إحنا مش لسه هنتكلم الحجاب فرض ولا مش فرض، في محجبة كويسة ومحجبة مش كويسة، والعكس، وأنا مضطر أشرح تاني إن في ناس بتعمل حسنات وناس بتعمل سيئات إنما الست لسه ما عملتش حسنات ولا سيئات، ليه طلب إحاطة لوقف منى زكي.
وواصل: يعني العيش والفراخ والأسعار والوظائف كل ده حليتوه ومفيش غير مسلسل منى زكي، هو أنتم شفتوه؟ المسلسل ده إنتاج مصري وبيلتزم بمعايير مصرية صارمة.
واستكمل: هو أنتم لسه شفتوه أمال لو كانت لابسة حاجة تانية كنتم عملتم إيه، منى زكي طالعة مقهورة ومنهارة وواضح من اسم المسلسل إنها قضية قانونية، وفي مسلسل لعبة نيوتن كانت برضه محجبة وبين لعبة نيوتن ودلوقتي الدنيا فرقت شوية، وهي بتقدم نماذج للمرأة في المجتمع منها المتعلمة والمقهورة.
وأردف: منى زكي جبارة ونموج محترم للممثلة المحترمة، ليه الثورة والهجوم ده عليها، استنوا لما المسلسل ينزل واتفرج على أول حلقة واطلق مدفعية زي ما أنت عاوز.
