شوبير يفتح النار على لاعبي الأهلي: الداخلية هو اللي استفاد بنقص العدد والدفاع كان شوارع
فتح الإعلامي أحمد شوبير، النار على لاعبي الفريق الأول للنادي الأهلي، عقب التعادل أمس أمام الداخلية بهدف لكل فريق في بطولة الدوري المصري الممتاز.
قال أحمد شوبير خلال تصريحات إذاعية: لما تفقد النظام تفقد كل حاجة، ولما تحافظ على النظام تحافظ على كل حاجة، الفرق بين أي حد وحد هي النظام، والالتزام بتعليمات الجهاز الفني، وده محصلش طبعا إمبارح من لاعبي الأهلي أمام الداخلية.
أضاف شوبير: لما تييجي تبص على نهاية المباراة، هتلاقي محمد مجدي أفشة معاه الكورة، وجنبه اتنين علي معلول وشادي حسين، وأي واحد هتروح له الكورة هيبقى انفراد، ولكنه اختار التسديد بشكل غريب، يعني أنت فريقك متقدم وفي الدقائق الأخيرة المفروض تحافظ على الكورة تستغل الفرص إنهي المباراة خلاص.
أوضح نجم الأهلي الأسبق: وشوف يعني الدقيقة كانت 90 وتلاقي معلول متقدم القندوسي متقدم وأفشة متقدم وحمدي فتحي متقدم وديانج متقدم، يعني 6 أو 7 في الهجوم وده الوقت اللي أنت المفوض تحافظ فيه تلاقي الداخلية بتعمل 6 تمريرات رائعة تصل للمهاجم اللي راوغ رامي ربيعة بغرابة، لأن المدافع كان سهل جدا يبطل الهجمة ولكن سددها المهاجم وأحرز الهدف.
الداخلة هو اللي استفاد بالنقص العددي
أكمل: في الوقت الضائع فريق الداخلية واصل هجومه وهو بيلعب 10 لاعبين، وأضاع لاعبيه ثلاثة فرص، وفي المقابل بقى وبغرابة شديدة فرصة محققة للنادي الأهلي بعد ارتداد الكرة من يد عماد السيد حارس الداخلية تصل إلى رامي ربيعة، لكن قبل ما يسددها دفعه محمد شريف بشكل غريب عشان يسددها ولكنه سقط.
شدد في نهاية حديثه: الدفاع كان شوارع وهناك تخوف داخل جماهير الأهلي من اهتزاز الأداء، خاصة ان الداخلية هو اللي استفاد بالنقص العددي وليس الأهلي، خاصة وأن علاء عبد العال المدير الفني قال أنه استعان بمواجهة صن داونز لدراسة المنافس.
