توقف قلبه 30 دقيقة.. كلب مذيعة شهيرة يفترس مواطنًا ويتسبب في دخوله غيبوبة
كشفت هند، ابنة الفنان الراحل سعيد صالح، تفاصيل واقعة افتراس كلب ضخم ملك المذيعة أميرة شنب، جارها وهو زوج صديقتها، مما أدى إلى إصابته بقطع في الأوتار والأعصام، وعض في الذراع والفخذ وأماكن متفرقة من الجسم، ويحتاج لعملية نقل أعصاب من القدم إلى اليد، ودخل في غيبوبة، وتم تأجيل العملية.
وكتبت هند سعيد صالح عبر حسابها على فيسبوك: محمد محب الماوي زوج صديقتي الغالية إيمان عبد المحسن ووالد علي وعاليا.. ولد وبنت زي القمر.. مدير ناجح في بنك عالمي.. حظه إنه ساكن تحته المذيعة أميرة شنب اللي بتقدم برنامج أميرة في المطبخ واللي عندها كلب بيتبول ضخم العضلات اللي من المحظور استيراده دوليا.
وأضافت: وبالرغم إن هو محب للحيوانات فعلا إلا إن الكلب ده كان دايما يهاجمه في الطالعة والنازلة وكان بيقول إنه صعبان عليه جدا إنه مش واخد عناية كافية في تحسين السلوك وإنه بيهاجم كل اللي بيشوفه.. يوم الأحد اللي فات قرر محب إنه يخبط على باب مدام أميرة عشان يطلب منهم يسيطروا شوية على كلبهم بدل ما هو عمال يهاجمهم كده من ورا السور القصير اللي عادي جدا إنه ينط من فوقيه!!.. فتحت له الشغالة وقبل ما يفتح بقه بكلمة واحدة خرج الكلب المفترس ده من وراها وهجم على محب في مدخل العمارة اللي كان واقف فيه ابنه علي وحاول إنه يفدي ابنه.. الكلب حرفيًا قام بافتراسه بدون مبالغة.
وتابعت هند سعيد صالح: عض في الذراع والفخذ وأماكن متفرقة من الجسم نتج عنه قطع نافذ في الأوتار والأعصاب !!! وفجأه المدخل كله بقى دم !!! طبعا ابنه واقف وشايف ده كله بيحصل لأبوه.. بالعناية الإلهية فقط استطاعوا أن يفلتوه من بين أسنانه وتوجهوا به لمستشفى دار الفؤاد بحكم إنها أقرب مستشفى كبير لهم.. بعد الفحوصات أكدوا إنه هيحتاج لعملية نقل أعصاب من القدم إلى هذا الذراع الذي تم تمزيقه.. بعد إجراء الفحص الطبي المطلوب دخل محمد غرفة العمليات وفور إعطائه حقنة التخدير توقف القلب لمدة 30 دقيقة تقريبا !! دخل في غيبوبة وتم إعطاؤه صدمات للقلب ونقله للرعاية المركزة وتم تأجيل العملية لأجل غير مسمى حتى يعود مرة أخرى للحياة.
واختتمت هند سعيد صالح حديثها، قائلةً: المحزن أنه لم يعد للوعي حتى الآن! مين المسؤول عن الكارثة دي؟ المذيعة اللي مربية وحش في بيتها وسايباه يهاجم الناس؟ ولا المستشفى المحترم اللى حقنته بمخدر أوقف قلبه في نفس اللحظة؟ وكل اللى بيتقال من المستشفى مانعرفش الأسباب اللي أدت لكده.. مانعرفش حيفوق إمتى أو حيفوق أصلا ولا لا ادعوله بالشفاء أرجوكم فالدعاء يغير الأقدار وهو الآن بين يدي الرحمن القادر على كل شيء.
