بركات: سيف الجزيري لازم يساعد نفسه.. ونتائج الزمالك في 2023 حاجة تزعل
علق محمد بركات عضو اتحاد الكرة على تراجع مستوى سيف الجزيري لاعب الفريق الأول لكرة القدم بنادي الزمالك، قائلًا: إن سيف الجزيري لازم يساعد نفسه، آخر 14 ماتش في الدوري مسجل في مباراة واحدة بس.
تصريحات محمد بركات
وأضاف محمد بركات في تصريحات تليفزيونية: لازم سيف الجزيري يرجع لمستواه، والجزيري قبل ما يروح كأس العالم حاجة وبعد ما جه حاجة تانية.
وواصل: لازم تراجع مستوى الجزيري نعرف سببه، ولازم تركيزه يرجع تاني، وبعد تراجع مستوى الجزيري إيه المانع لما تدي الفرصة لناصر منسي، ممكن تحمي سيف الجزيري عشان فيه ضغوط عليه سواء من المسؤولين في الزمالك أو الجمهور، ممكن تريحه أو ترفع الضغط عنه، وانتقد محمد بركات نتائج الفريق الأول لكرة القدم بنادي الزمالك، في عام 2023.
وقال بركات في تصريحاته: نتائج الزمالك في 2023 حاجة تزعل، كسب ماتشين بس في 2023، ودي حاجة تزعل، وفي دور المجموعات في دوري أبطال أفريقيا مكسبش ولا ماتش.
وتابع بركات: 6 خسائر للزمالك في 2023 مع احتساب نتيجة مباراة الزمالك ضد بيراميدز في الكأس بالتعادل.
وفي سياق آخر، قال بركات: لقطة أحمد عبد المقصود اللي الناس بتنشرها عبر مواقع التواصل الاجتماعي، كانت لقطة في بداية الماتش، مش في الدقيقة 85.
وأضاف بركات: أحمد عبد المقصود مدرب محترم، والناس عايزة تستغل أي حاجة عشان تطلعها ترند.
واختتم نجم الكرة المصرية السابق: المخرج عاد اللقطة فقط في الدقيقة 85، وواخد كادر معين، لكن الناس عايزة أي حاجة تطلعها ترند أحمد عبد المقصود مدرب محترم، وفي خدمة نادي الزمالك دايما.
