بشرى: مش بحب المناصب لأنها بتخلي الإنسان إيده مغلولة.. والفنان الواعي بيخدم بلده من غير مناصب
قالت الفنانة بشرى، إن هناك الكثير من قضايا المرأة التي يجب الاهتمام بها وتقديمها في الأعمال الفنية، مشيرة إلى أنه يجب الاهتمام بالمرأة فوق منتصف العمر وليس الاهتمام بشريحة معينة صغيرة في السن.
وأضافت بشرى على هامش حضورها مهرجان أسوان لأفلام المرأة: فيه قضايا كتير محتاجين نقدمها عن المرأة، ومحتاجين مواضيع المرأة ممن هي فوق منتصف العمر وليس فقط أدوار الشباب والفتيات، لأن الست المصرية عندها مواضيع كتير ومحتاجين نتلكم عنها.
وأضافت: جاية النهاردة مهرجان أسوان عشان خاطر عيون نبيلة عبيد وهي في قلبي وليها فضل كبير عليا، وهي إنسانة غير إنها فنانة استثنائية بمعنى الكلمة ومش هيجي شبهها.
لا أحب المناصب لأنها بتقيد
وأكدت بشرى أنها لا تحب المناصب، موضحة: مش بحب المناصب لأنها بتقيد وبتخلي الإنسان إيده مغلولة ومش بيعرف يتصرف بحريته، بحس إني نقيبة بلا حقيبة ووزيرة وسفيرة بلا حقيبة الفنان الواعي والمثقف والمدرك لدوره بيمثل بلده في كل حاجة وبيخدم بلده من غير مناصب وأنا أحب أكون هذا الشخص وأحب أدعم الشخص اللي في المنصب من غير أي حاجة ومن غير ما آخد لقب.
بخاف من الحسد
كما أكدت بشرى أنها تخشى الحسد، قائلة: يا رب يبعد عني العين لأني بخاف من الحسد، وبعمل حساب الحسد دلوقتي أكتر من قبل كده لأننا بقينا على المشاع بسبب السوشيال ميديا والموضوع بقى صعب.
