غادة إبراهيم: بوزع شكاير طعام على المحتاجين كل رمضان.. ومعنديش كبائر أخجل منها
تحدثت الفنانة غادة إبراهيم عن طقوسها في شهر رمضان، مؤكدة أنها تحرص على توزيع الطعام على المحتاجين باستمرار.
وقالت غادة إبراهيم خلال حوارها مع القاهرة 24: أنا جبت شكاير عشان أوزعها على المحتاجين في رمضان، وبعمل كدا كل رمضان ومقدرش أبطل حتى لو مش معايا فلوس، لأن عندي عائلات مسئولين مني ولما مش بيكون معايا فلوس زي كل البشر بستلف عشان أوزع وأجيب، وربنا بيرزقني بعدها وإحنا ربنا بيرزقنا عشان ندي للمحتاج ولما براضي حد بيجيلي فلوس ورزق وبيفرجها.
وواصلت غادة إبراهيم: لو ربنا افتكرني أي وقت هيحاسبي على الموبقات والذنوب؛ لأني معنديش كبائر ولا أشياء خجلانة منها وعندي ناس بيدعوا ليا، وعندي حاجات بتقعد لي ليوم الدين وعارفة إني سايبة رصيد لما أموت وفيه أشياء تشفع ليا.
وأضافت غادة إبراهيم: ليلة النصف من شعبان كانت أمبارح وربنا لا يغفر للمشرك والمشاحن والمشاحن دا اللي بيتخانق ويتوعد بني آدم ويأذيه عمدًا ويشارك في أذاه، إنما لو أنا مظلومة من حد ومش قادرة اكلمه ولا أقوله سامحني دا مش مشاحن دا مظلوم، وأنا مش هقدر أسامح الناس اللي أذوني عشان ليلة النص من شعبان دا أنا مظلومة.
غادة إبراهيم: لازم نبص للدنيا كأننا هنموت النهاردة
واختتمت غادة إبراهيم حديثها، قائلة: مع الأسف الناس أشتروا الدنيا بالأخرة ومبقاش حد بيبص للأخرة والشيطان متمكن منهم، ولكن ربنا كبير ورحيم وبيهدي المشركين والملحدين، ولازم نبص للدنيا كأننا هنموت النهاردة قبل بكرا ومينفعش نشتري الدنيا ونرمي الأخرة.
