داليا مصطفى لـ القاهرة 24: نزلت أتمشى في شبرا واتفاجئت إن الناس لسه بتعاكس
كشفت الفنانة داليا مصطفى تفاصيل معاكستها على الكورنيش، مشيرة إلى أنها قررت أن تتمشى في شبرا المنطقة التي عاشت فيها طفولتها.
وقالت داليا مصطفى لـ القاهرة 24: أنا ما اتتعرضتش للتحرش، مش للدرجة دي، لكن كنت ماشية على الكورنيش واتفاجئت إن الناس لسه بتعاكس، وفكرت الناس بقى عندها فكر وفيه فيس بوك وإنستجرام ولو حد عاوز يصاحب أو يشقط حد يكون بالطريقة دي مش بالمشي.
وأضافت: هما مش واحد كانوا كتير والدنيا كانت ضلمة وما كنوش شايفين هما شايفين ست ماشية، وما صدقتش وما تخيلتش إن فيه حد بيعمل كده.
وتابعت: اتهفيت في دماغي وقلت أنزل على رجلي، لأني بتمنى أعمل كده على طول ومش بقدر وزهقت من المشي في زايد وأكتوبر وأنا من شبرا فنزلت على كورنيش شبرا ما لقيتش الكورنيش ولا بتاع الشاي والحمص وما عرفتش أعمل إيه واتمشيت شوية في منطقتنا واسترجعت شوية ذكريات.
وكانت داليا مصطفى نشرت فيديو لايف كشفت من خلاله تعرضها للمضايقات وقالت في الفيديو الذي نشرته عبر حسابها بموقع إنستجرام: قررت أتمشى شوية في الشارع لقيت عربية ماشية ورايا شوفوا واقفة إزاي بعيد ومستني إزاي أنا كنت فاكرة إننا اتقدمنا ومبقاش فيه تحرش لكن للأسف موجود وأنا زعلت والله زعلت وأنا بتمشى.
أحدث أعمال داليا مصطفى
على جانب آخر، تشارك داليا مصطفى في الموسم الرمضاني بمسلسل علاقة مشروعة، بالتعاون مع الفنان ياسر جلال، إلى جانب مي عمر، ميمي جمال، مراد مكرم، عفاف مصطفى، وآخرين ومن تأليف سماح الحريري وإخراج خالد مرعي.
