حسن شاكوش لـ القاهرة 24 في حفل زفافه: اخترتها ست بيت
أعرب مطرب المهرجانات الشعبية حسن شاكوش، عن سعادته باحتفاله بليلة زفافه، مؤكدًا أنه كان حريصًا جدا أثناء اختيار شريكة حياته.
وقال حسن شاكوش في لقائه مع القاهرة 24، قبل بدء حفل زفافه: كل واحد بينقي شريكة حياته وكل واحد بيختار هو عايز يعيش ازاي، وأنا اخترت إن مراتي تكون ست بيت والحمد لله معاها تعليم عالي، وكده كده هي بنت الجيران والحمد لله.
أما عن سبب عدم إعلان ارتباطه ومفاجأة الجمهور بخطبته، فقال: اتعلمت الفترة اللي فاتت إن كل ما أطلع أقول حاجة في موضوع الجواز أكيد الناس اللي بتحب الخير كتير جدًا وأقولهم ربنا يسهلكم ومن عمل يُعمل ولو بعد حين، واللي بيحاول يخرب بيت حد ربنا مبيسيبش، وبتمنى لكل الشباب إنهم يتجوزوا ويعيشوا حياة كريمة ونضيفة.
وأضاف حسن شاكوش، أن مشواره الفني لن يتعطل بسبب إقباله على خطوة الزواج، موضحًا: الجواز عمره ما بيعطل، والحياة بتاخدنا والسن بيجري ولازم الإنسان يكون أسرة كويسة.
حسن شاكوش: لغيت لمراتي فيس بوك والانستجرام
وأشار حسن شاكوش إلى أنه أغلق حسابات زوجته على جميع منصات التواصل الاجتماعي، قائلًا: أنا لما طلبت إيديها كانت مخطوبة وبعد كده ربنا كرم الحمد لله وكانت من نصيبي وبقت معايا الحمد لله، وقفلت لمراتي فيس بوك وإنستجرام ومش عندها غير واتس آب فقط.
حفل زفاف حسن شاكوش
ويحتفل حسن شاكوش بزفافه اليوم في أحد الفنادق الكبرى في القاهرة، بحضور أسرة العروسين والأصدقاء، ومن المقرر أن يُحيي الحفل كلًا من: الفنان تامر حسني، عمر كمال، حمو بيكا، رامي صبري، رضا البحراوي، من خلال تقديمهم باقة من ألمع أغانيهم، حسب مصادر لـ القاهرة 24.
