محمد ياسين: أصبحنا عبيدا لسيطرة الرأي العام علينا.. وعلى مدار مسيرتي لم يُفرض عليَّ ممثل
تحدث المخرج محمد ياسين عن دور السوشيال ميديا في الفن، وفي حياة الفنانين، مشيرًا إلى دوره الكبير في الترويج لمعظم الأعمال وشهرتها بشكل كبير.
وقال المخرج محمد ياسين، خلال حواره مع القاهرة 24: لطيف إن الناس تقول رأيها في الأعمال الفنية والممثلين، والسوشيال ميديا سهلت ده، بس المشكلة إن بعد فترة الرسائل والكومنتات دي بتلاقي رواج عند الأصدقاء وتكوّن رأي عام، لحد ما يكبر ويبقى أمر واقع، والناس تبدأ تتعامل مع الممثل اللي الكلام عليه كتير إنه أحسن ممثل وغول تمثيل وتتعامل معاه بقدسية غريبة.
وتابع المخرج محمد ياسين: وأنا مثلا يكون من وجهة نظري كمخرج بقالي 30 سنة إنه ممثل متوسط القيمة، فالمصيبة إن في وجود السوشيال ميديا بقينا ننام ونصحى نكتشف إن فيه عمل مكسر الدنيا وممكن ميعجبكش فـ تحس إن أنت اتجننت.
وأردف المخرج محمد ياسين قائلًا: ردود فعل السوشيال ميديا هي اللي بقت بتكوّن اتجاهاتنا نحو الأعمال والممثلين، والموضوع ده كل شوية بيزيد وإحنا بقينا عبيد لفكرة سيطرة الرأي العام علينا.
وأشار ياسين إلى كيفية تفاديه الوقوع في فخ أراء السوشيال ميديا، وقال: بتعامل مع الموضوع بقناعتي التامة، أنا مش هزيّف ولا هجمّل قناعاتي، ومهم أوي إنك تسمع الآراء وتعرف هما شايفين الممثل أو العمل ده مميز ليه، بس في النهاية أنت ليك عقل وقناعات تحدد من خلالها هو فعلًا حلو ولا لأ، مش إني أمشي ورا كلامهم وخلاص.
محمد ياسين: لم يُفرض عليَّ ممثل خلال مسيرتي الفنية
واختتم المخرج محمد ياسين بالحديث عن فكرة فرض الممثل على المخرج، وقال: الحمد لله على مدار مسيرتي كلها لم يُفرض عليَّ ممثل، وبستغرب أوي لما تبقى مذيعة بقالها 30 سنة مثلا في هذه المهنة، وتسأل ممثل في حوار، تقوله مين اللي رشحك، لأن طبعًا الناس متخيلة إن بطل العمل هو دايمًا اللي بيرشح، والمصيبة إن السؤال ده بيتسأل في وجود مخرج العمل.
