إلحقوني ضحك على بنتي .. ننشر أقوال والد فتاة الصف بعد هتك عرضها وحملها سفاحا | تحقيقات
كشفت التحقيقات في قضية هتك عرض فتاة الصف البالغة من العمر 17 عامًا على يد شاب وحملها منه سفاحًا بمنطقة الصف التابعة لمحافظة الجيزة، تفاصيل الواقعة من أقوال والد المجني عليها أمام جهات التحقيق.
يواصل القاهرة 24 نشر التحقيقات في واقعة هتك عرض فتاة وحملها سفاحا بمنطقة الصف، حيث جاءت أقوال والد المجني عليها أمام جهات التحقيق كالتالي:
هو اللي حصل إن فيه واحد كان بيحاول إنه يكلم بنتي وأنا روحت لأهله ووعدوني إنه مش هيتعرض لبنتي تاني وبعد كده وفي شهر 2 تقريبا جالي ومعاه واحد من كبار البلد وطلب إنه يخطبها وأنا وافقت وكنا محددين على العيد الكبير إننا نجيب الشبكة بس هو قالي إنه عامل جمعية عشان هيجوز أخته والنهاردة تفاجأت إن شيخ البلد كلمني وقالي تعالى المركز قولتله ليه قالي تعالى المركز وهما المركز طالبينك في موضوع.. ولما وصلت المركز عرفت إن بنتي كانت حامل وولدت، وأن خطيبها هو اللي عمل كده وأنا بتهمه إنه ضحك عليها وعمل معاها كده وده كل اللي حصل.
سـ: وما سبب توجهك لديوان مركز الشرطة؟
جـ: هو شيخ البلد كلمني وقالي تعالى عشان عايزينك في القسم عايزينك عشان موضوع بنتك.
سـ: وكيف نما إلى علمك بالواقعة محل التحقيق تحديدا؟
جـ: هو لما روحت مركز الشرطة هناك الضباط قالولي على اللي حصل.
سـ: وما الذي أخبرك به رجال الضبط بمركز الشرطة؟
جـ: هما بلغوني إن بنتي كانت في مستشفى الصف وهي في الحمامات بتاعت المستشفى ولدت، وإن هي كانت حامل من خطيبها.
سـ: وما هي علاقة المتهم بابنتك تحديدا؟
جـ: هو خطيبها.
سـ: ومنذ متى تلك الخطبة؟
جـ: هي من حوالي 5 أشهر.
سـ: وهل ثمة علاقة سابقة عن تلك الخطبة بين سالفي الذكر؟
جـ: هو لما كان بيحاول يتردد ناحية بيتي وقفته وبلغت أهله بكده.
سـ: وهل ابنتك كانت حبلى من المشكو في حقه؟
جـ: أيوه.
سـ: ومتى تحديدا نما إلى علمك ذلك؟
جـ: أنا عرفت الكلام ده النهارده.
سـ: وهل كان ثمة مظاهر لحمل ابنتك قبل الولادة؟
جـ: أنا مشفتش.
سـ: وما هي كيفية قيام المشكو في حقه بارتكاب تلك الواقعة؟
جـ: أنا معرفش عمل کده إزاي.
سـ: وهل عاشر المشكو في حقه ابنتك معاشرة الأزواج؟
جـ: أيوه.
سـ: ومتى تحديدا ارتكب سالف الذكر الواقعة؟
جـ: أنا معرفش.
سـ: وهل ثمة إكراه أو تهديد وقع على ابنتك؟
جـ: أنا معرفش.
سـ: وهل المشكو في حقه والد الطفل؟
جـ: أيوه.
سـ: وكيف وقفت على ذلك؟
جـ: لأن في المركز البنت قالت إن هو ابنه.
سـ: وما هو عمر ابنتك؟
جـ: هي عندها 17 سنة.
سـ: هل تتهم المشكو في حقه أي اتهام؟
جـ: أنا بتهمه إنه ضحك على بنتي واغتصبها وخلف منها.
سـ: وكيف وقفت على ذلك؟
جـ: لأن ده اللي حصل.
سـ: وما قصد المشكو في حقه تحديدا؟
جـ: هو قصده يضحك على بنتي واغتصبها وخلّف منها.
سـ: وكيف وقفت على ذلك؟
جـ: لأن ده اللي حصل.
سـ: هل لديك أقوال أخرى؟
جـ: لا.
