حكيم: الأغنية الشعبية زي كرة القدم الشعب كله بيسمعها.. وهذه كواليس غنائي السلام عليكم
حل المطرب حكيم ضيفًا على الإعلامية إسعاد يونس في برنامجها صاحبة السعادة وتحدث عن بداية مشواره وكواليس أشهر أعماله.
وقال حكيم عن بداية مشواره: في ناس في أمريكا قالوا لي لما بنسمعك بنشم ريحة مصر، وفي ناس كان بقى لهم 30 سنة ما رجعوش مصر قالوا لي بنشم ريحة مصر لما بنشوفك والتعبير ده لمسني بجد لأني بفكرهم بمصر وأنهم مصريين وما اتغيروش مع الغربة والحياة والدنيا هناك ما غيرتهمش وحابين اللون الشعبي.
وأضاف: الأغنية الشعبية بيسمعها كل الشعب، زي كرة القدم العالم كله بيتقرج عليها، وكذلك الأغنية الشعبي الشعب كله بيسمعها ويتذوقها ومفيش حد جذوره مش شعبية، والتيم الشعبية والمفردات والكلام الشعبي عايش جوانا وأنا كنت حريص آخد من الناس.
حكيم يروي تفاصيل غنائه السلام عليكم
كما كشف حكيم كواليس أغنيته السلام عليكم، قائلًا: زمان كان في فرح شعبي في الشارع في حديقة في الحسين ولقتيت واحد بيقول السلام عليكم بنفس الطريقة اللي اتقالت في الأغنية وياخد فلوس من الناس، وسمعت أمل الطاير وفضلت معانا 3 أو 4 سنين.
وتابع حكيم: في وقت مقارب لقيت مطرب عامل أغنية بتبدا بـ وبعد السلام، زي ما عملنا في الأغنية بعد كده فدورنا على المطرب لاقيته محبوس والملحن متوفى، فروحت لحسن اش اش الملحن وخدت الشاعر أمل الطاير وهناك حكيت ليهم فعمل اللحن الأول وبعدين أمل كتب الكلمات، ولما طلع المطرب من السجن راضيناه بحقه مقابل الجملة الخاصة به لكننا غيرنا كتير في الأغنية وضيفنا لها.
