مي سليم: مفيش حاجة اسمها الشغل أهم من الزواج.. وفيه رجالة بيحبوا الست الناجحة
كشفت الفنانة مي سليم إمكانية زواجها مرة أخرى، مؤكدة أن الفن لا يتعارض مع الزواج وعندما تدخل في علاقة عاطفية ستعلن للجمهور.
وقالت مي سليم لـ القاهرة 24: أنا معنديش مانع أتجوز تاني، بالعكس لو فيه أي علاقة عاطفية هعلن والناس هتتبسط ليا ومش هخبي، ومفيش حاجة اسمها الشغل أهم من الجواز ومفيش تعارض بينهم، وفيه رجالة أقوياء وعندهم شخصية وبيقدروا الست وبيحبوا الست اللي بتشتغل والناجحة وبيحبوا يشوفوا نجاحها ومش كل الناس زي بعض.
كما سبق وكشفت مي سليم تفاصيل شخصيتها في مسلسل تلت التلاتة بطولة غادة عبد الرازق، والمقرر عرضه في الموسم الرمضاني 2023، حيث قالت في تصريح سابق لـ القاهرة 24: أنا الفترة دي بعمل شخصيات بعيدة عني تماما وعكس شخصيتي، وبجسد في تلت التلاتة شخصية واحدة عملية ومش بتهتم بعواطفها ومرت بأزمات كتير في حياتها كونت الشخصية دي وبقيت شايفة إن من حقها تستغل كل شيء لمصلحتها، والشخصية أكيد هتتهاجم ولكن ممكن ناس تتعاطف معاها بردو.
مسلسل تلت التلاتة
يذكر أن مسلسل تلت التلاتة يعد ثاني تعاون بين مي سليم وغادة عبد الرازق ويضم العديد من الفنانين، أبرزهم محمد القس، ليلى أحمد زاهر، مصطفى درويش، أحمد مجدي، إسلام فوزي، صلاح عبد الله ونجوى فؤاد، والمسلسل من تأليف هبة الحسيني، وإخراج حسن صالح، وتدور أحداثه في إطار من الدراما والتشويق.
