إنجي المقدم عن ظهورها دون مكياج: احنا ممثلات مش عارضات أزياء
تحدثت الفنانة إنجي المقدم عن شخصية صفية التي جسدتها في مسلسل ولد الغلابة بطولة الفنان أحمد السقا، وبجانب ذلك سبب ظهورها دون مكياج في أعمالها الفنية.
وقالت إنجي المقدم خلال حوارها مع القاهرة 24: كنت مخضوضة من ردود الفعل على دوري في مسلسل ولد الغلابة، وواحد وأنا في العربية دعا عليا وقالي حرام عليكي ياشيخة حسبي الله ونعم الوكيل حد يعمل كده في أخوه.
وأضافت إنجي المقدم: بزعل لما تتشتم شخصية صفية، أنا حبيتها وشوفت ليها مبررات، وده الدور اللي بين إني ممكن ألعب كل الأدوار، لأنه جالي بعد مسلسل ليالي أوجيني وكانت مقدمة شخصية صوفيا وهي رقيقة وناعمة.
وعن ظهورها دون مكياج في أعمالها، علقت إنجي المقدم: بحب أظهر من غير مكياج عشان أتصدق، وعشان أنا كمان أصدق نفسي إحنا مش عارضات أزياء احنا ممثلات، وبشوف برا مصر نموذج ستات بيلهموني، اللي حالقة شعرها عشان دور، وأنا بحب الفن وبحاول أكون صادقة مع نفسي واللي بيتفرج عليا.
واستكملت إنجي عن الشخصية التي أثرت عليها نفسيًا، قائلة: شخصية صفية أثرت عليا نفسيا وكنت متعصبة دايما في البيت، ومش سهل ألاقي أدوار مختلفة، وبحب التحدي والأدواراللي معملتهش قبل كده وأشوف هتوديني لفين.
مسلسل ولد الغلابة
عرض مسلسل ولد الغلابة في رمضان 2019، وحقق نجاحًا كبيرًا، وضم عددا من النجوم أبرزهم، أحمد السقا، مي عمر، محمد ممدوح، وعددا آخر من الفنانين، والعمل من تأليف أيمن سلامة وإخراج محمد سامي.
