رسالة مؤثرة لفتاة أقصرية: والدتي شالت بابا في مرضه 10 سنين.. وتستحق الأم المثالية
أرسلت فتاة أقصرية تدعى ميرنا فكتور ألفى لـ القاهرة 24 رسالة مؤثرة والدتها بمناسبة عيد الأم تقول فيها: أمي تستحق الأم المثالية لأنها تعبت وكافحت معانا كتير بعد وفاة أبي منذ 6 سنوات على أثر حادث أليم.
بتشيل بابا على كتفها 10 سنين
تقول ابنة الأقصر: أمي اسمها شهيرة فكري تعبت مع بابا 10 سنين بعد ما عمل حادثة وأصيب فيها بارتجاج في المخ وضمور في الخلايا، ومكنش بيتحرك، وهي كانت بتشيله على كتفها، وتعبت كتير، وكانت بتقابل كل التعب ده بحب ليه وكانت سند كبير لجوزها وبناتها.
تعب وجهد منذ 6 سنوات
وتضيف ابنة الأقصر قائلة: بعد وفاة أبي منذ 6 سنوات وما زالت أمي مستمرة في تعبها ومساندتها لنا نحن بناتها،
كي توفر لنا حياة كريمة فهي تعمل على عربيتها الخاصة بتوصيل الطلاب للمدارس.
حاسين بتعب ماما
وتستكمل ابنة الأقصر: أمي بتحب التعب والشقى علشان هي ست بمليون راجل، وسعت لأجل تعليم بناتها، وبناتها حققوا كل اللي نفسها فيه بالمذاكرة والجد والاجتهاد علشان تعبها مايضعش.
3 بنات في مراحل تعليم مختلفة
وتضيف ابنة الأقصر: إحنا 3 بنات ميرنا 23 سنة - كلية تجارة إنجليزي، وساندرا 20 سنة - كلية إعلام، ومارنيلا 14 سنة - تانية إعدادي، وقابلت كل ده بمفردها وبدون مساعدة أي حد.
يا جبل ما يهزك ريح
وقالت ابنة الأقصر: أمي كانت راجل وسند لينا وهي تستحق الأم المثالية حقيقي، وإحنا بناتها حبينا نعمل لها التكريم ده ونقولها بناتك بيقولوك يا ماما إنتي ست عظيمة إنتي تستحقي أم مثالية وأكتر من كده، كل سنة وإنتي طيبة يا ست الكل ويديكي طولة العمر ويخليكي لينا يا جبل ما يهزك ريح.
