ياسر جلال يكشف سر ابتعاده عن اللقاءات التليفزيونية: بيجيلي دوخة ومبعرفش أتكلم عن شغلي
كشف الفنان ياسر جلال سبب ابتعاده عن الظهور في لقاءات تليفزيونية، مشيرًا إلى أنه يصاب بدوار إذ ظهر في لقاء تليفزيوني.
وقال ياسر جلال خلال لقاء مع الإعلامي رامي رضوان في برنامج مساء دي إم سي: بيجي لي دوخة لما بطلع في أي برنامج وبكون مش مرتاح وطاقتي كلها بتخلص في الشغل ومبعرفش أتكلم عن شغلي.
وأضاف ياسر جلال: بسيب النقاد هما اللي بيتكلموا وبتقبل كل حاجة؛ لأن مفيش حد كبير على النقد، واللي بيزعل من النقد ميبقاش تحت الضوء، وأهم شيء تكون راضي وضميرك مرتاح.
وأكد ياسر جلال عن فخره لانتمائه للوسط الفني قائلًا: أنا فخور إني بنتمي للوسط الفني وإحنا على عكس ما الناس بتشوفنا وممكن زميل يتفهم غلط في مكان أو مناسبة وشغلنا متعب جدا ومش بنقصد نعمل حاجة غلط، وزمايلي بيتعرضوا لهجوم شديد.
وأضاف: بستغرب من الهجوم على بعض الفنانين فلو حد منهم أخطأ في شيء معين بقول له هل نسيت تاريخه؟ ولو تعثر بلاش تدبحه وأقف في ضهره وبلاش انتقاد بـ تجريح وتموت الفنان ليه؟ فين التسامح والحب؟ الفنان لازم يكون مقدر أكتر من كدا، الفنانين بيسعدونا والفن شيء عظيم ومش حرام دا رسالة قوية جدا.
ياسر جلال في رمضان 2023
ويخوض ياسر جلال السباق الرمضاني من خلال مسلسل علاقة مشروعة مع الفنانة مي عمر، الذي أكد أنه سيكون ممتعًا ومشوقًا ويناقش رسالة مهمة، مشيرًا إلى أنه قابل شخصيات في الحقيقة نفس شخصيات العمل.
