أبرز تصريحات أرملة أحمد راتب: زواجنا استمر 38 سنة بسبب الصداقة
حلت السيدة فيرا، أرملة الفنان أحمد راتب، ضيفة على الإعلامية ياسمين عز في برنامجها كلام الناس المذاع عبر شاشة قناة MBC مصر، وتحدثت خلال اللقاء عن تفاصيل حياتها مع الراحل أحمد راتب، وتفاصيل اللحظات الأخيرة في حياته.
ونستعرض لكم أبرز تصريحات أرملة أحمد راتب في برنامج كلام الناس:-
- أحمد راتب كان عنده مشكلة في الرئة حوالي سنة وكان دايمًا يحصله سدة رئوية وضيق في التنفس ويدخل العناية المركزة لمدة 4 أو 5 أيام ويخرج، لغاية ما دخل المستشفى لمدة أسبوع في العناية المركزة وكنا فاكرين إنه هيرجع زي كل مرة ولكن توفي.
- أزواج بناتي راحوا المستشفى قالولهم أن المسألة خلاص مجرد ساعات ويتوفى، فجوز بنتي مسح كل الأرقام علشان ميتصلوش عليا، وبعدين رجع وقال بابا فاق وعايز يشوفنا ولكن أنا كنت حاسة إنه توفي.
- زميلاته أخواتي والوسط متفاهمين وقريبين من بعض والمعجبات يعتبر أنهم نوع من شغله عمره ما إداني إحساس أني أغير.
- كان في وقت موسم شغل جامد ومكنتش بلحق أشوفه، ووصلني إشاعة إنه متجوز عليا وقاعد في شقة في مصر الجديدة بكل التفاصيل، طبعًا أنا علشان في ثقة مصدقتش، وهو عرف الموضوع ده بعد 15 سنة لما قولت في برنامج.
- زواجنا استمر 38 سنة وأهم حاجة الصداقة ونبقى متفاهمين ونحكي لبعض كل حاجة، دي أهم حاجة والقرب في الأفكار، ومحاولة أن اهتماماتنا تكون واحدة.
- بنتي جابت حد يرسم الحيطة كلها بصورة والدها الله يرحمه وقالتلي تعالي شوفي يا ماما واتفاجئت بالصورة كأنه هو قدامي، وكانت مفاجأة جميلة جدًا، كان واحشني جدًا وتخيلت إنه رجع.
