البلوجر سارة محمد محمود في أحدث ظهور لها: العين اليسرى حصلها ضمور ومفيش فيها أمل
ظهرت البلوجر سارة محمد محمود، عبر مقطع فيديو جديد، بموقع التواصل الاجتماعي فيسبوك، خلال الساعات القليلة الماضية، لتطمئن متابعيها على حالتها الصحية.
البلوجر سارة محمد محمود في فيديو جديد لها
وقالت سارة: أنا طالعة أطمنكم عليا وأشكركم جدًا لدعمك ليا وللناس اللي بتدعيلي عند الكعبة.. دي أكتر حاجة بتسبب لي السعادة، أنا حابة اطمنكم عليا أتابع معاكم، أول حاجة حابة أقولها ليكوا إني الحمد لله راضية بكل حاجة أنا وصلتلها، أنا أه فقدت عيني بس عندي أمل إنه في يوم من الأيام إن أرجع أشوف.. لسه الأمل متقطعش عندي، أنا راضية حتى لو كل حاجة اتأخرت.. انشاء الله ربنا يجعلني من الصابرين وأهل الجنة.
ضمور العين اليسرى
وتابعت سارة: من يومين روحت القاهرة عملت أشعة على العصب البصري لـ عيني اليمين، لأن خلاص العين الشمال حصلها ضمور ومفيش فيها أمل، وللأسف نتيجة الأشعة وضحت إن عصب العين ضعيف جدًا، بس أنا مزعلتش لما عرفت وقولت الحمد لله، وبردوا عندي امل في ربنا انه هيعوضني خير.
وأضافت: روحت النهارة لدكتور هنا في الإسكندرية وخدت حقن وعلاج مقوي للعصب، واداني أمل وتفاؤل كبير جدًا وهيحاول معايا.. أنا حابة أشكر الدكاترة اللي عملولي العملي وكل اللي وقفوا جنبي ومقصرش معايا، وحابة إن الكل يدعيلي في الشهر الكريم إن الأمل يزيد عندي.
وفي سياق متصل، ظهرت البلوجر سارة محمد، خلال الأيام القليلة الماضية، بعد فقدانها البصر بشكل تام، مع البلوجر شاهي موسى على تيك توك، لتطمئن الجمهور على حالتها الصحية، وتطالب بسرعة سفرها للخارج من أجل علاجها.
